बीपीएससी TRE-4 में 932 पद बढ़ल, आब 33,320 शिक्षकक बहाली

माध्यमिकमे 493 आ उच्च माध्यमिकमे 439 पदक वृद्धि, मैथिलीमे 178 सीट बढ़ल

पटना । समदिया

बिहारमे चारिम चरणक शिक्षक बहाली (TRE-4) लेल अभ्यर्थी सभक लेल महत्वपूर्ण खबरि अछि। बिहार लोक सेवा आयोग (BPSC) शिक्षक बहालीक लेल 932 पद बढ़ा देलक अछि। पहिने 32,388 पद पर नियुक्ति हेबाक छल, मुदा आब कुल 33,320 पद पर शिक्षक बहाल होयत। आयोग बढ़ल रिक्ति संबंधी अधिसूचना जारी कए देलक अछि।

माध्यमिक शिक्षकक रिक्ति 3,877 सँ बढ़ि कए 4,370 भऽ गेल अछि। एहि स्तर पर 493 पद बढ़ल अछि। ओतहि उच्च माध्यमिकमे 16,101 सँ बढ़ि कए 16,540 पद भऽ गेल अछि। एहि स्तर पर 439 पद बढ़ाओल गेल अछि।

माध्यमिकमे 16 विषयमे बढ़ल पद

माध्यमिक शिक्षकक 16 विषयमे रिक्ति बढ़ाओल गेल अछि। नृत्यमे 167 आ संगीतमे 111 अतिरिक्त पद जोड़ल गेल अछि। आयोग जिला आ विषयवार रिक्तिक विवरण सेहो जारी कएने अछि।

उच्च माध्यमिकमे मैथिली लेल 178 पद बढ़ल

उच्च माध्यमिक स्तर पर आठ विषयमे अतिरिक्त पद जोड़ल गेल अछि। एहिमे बांग्ला, भोजपुरी, मगही, मैथिली, पाली, प्राकृतिक, अरबी आ फारसी शामिल अछि। मैथिलीमे सर्वाधिक 178 पद बढ़ाओल गेल अछि। भोजपुरीमे 81 आ प्राकृतिक विषयमे 62 पद बढ़ल अछि।

25 अक्टूबर धरि रजिस्ट्रेशन

TRE-4 लेल रजिस्ट्रेशन करबाक अंतिम तिथि 25 अक्टूबर अछि, जखनिकि ऑनलाइन आवेदन 26 अक्टूबर धरि जमा कएल जा सकैत अछि। अभ्यर्थी आवेदन करबाक पूर्व विषय, शैक्षणिक योग्यता आ जिला-वार रिक्तिक जानकारी आयोगक विज्ञापनमे अवश्य देखथि। विस्तृत जानकारी BPSCक आधिकारिक वेबसाइट पर उपलब्ध अछि।