पटना स्नातक सीट पर नीरज कुमार पर जदयू केर भरोसा कायम
चारिटा विधान परिषद सीट लेल जदयू घोषित केलक प्रत्याशी
पटना । समदिया
बिहार विधान परिषदक स्नातक आ शिक्षक निर्वाचन क्षेत्रमे होबयवाला चुनाव लेल जनता दल यूनाइटेड (जदयू) चारिटा सीट पर अपन प्रत्याशीक घोषणा कए देलक अछि। पार्टीक प्रदेश अध्यक्ष उमेश सिंह कुशवाहा द्वारा जारी सूचीमे पटना स्नातक सीटसँ नीरज कुमार, तिरहुत स्नातकसँ अभिषेक झा, सारण स्नातकसँ आनंद पुष्कर आ दरभंगा स्नातक निर्वाचन क्षेत्रसँ घनश्याम रायकेँ प्रत्याशी बनाओल गेल अछि।
अनंत सिंहक विरोधक बावजूद नीरजकेँ भेटल टिकट
पटना स्नातक निर्वाचन क्षेत्रक सीट पर नीरज कुमारक नाम पहिनेसँ चर्चामे छल। मोकामा विधायक अनंत सिंह नीरज कुमारकेँ फेर टिकट देबाक विरोध कए रहल छलाह। दुनू नेताक बीच एहि मुद्दा पर सार्वजनिक रूपसँ बयानबाजी सेहो भेल छल।
हालमे केंद्रीय मंत्री ललन सिंहक जदयू अध्यक्ष नीतीश कुमारसँ भेल मुलाकातक बाद दुनू पक्षकेँ एक-दोसराक विरुद्ध बयानबाजीसँ परहेज करबाक कहल गेल छल। आब पार्टी विवादकेँ पाछाँ छोड़ैत पटना स्नातक सीटसँ नीरज कुमार पर फेर भरोसा जतौलक अछि।
