जमीन कब्जा मामिलामे बेलसंड विधायक अमित कुमार रानूक आवास पर पुलिसक छापामारी

मुजफ्फरपुर । समदिया

बिहारक मुजफ्फरपुरमे जमीन विवाद आ कथित कब्जाक मामिलामे बेलसंडसँ लोक जनशक्ति पार्टी (रामविलास)क विधायक अमित कुमार रानूक अहियापुर स्थित आवास पर रविकेँ भोर पुलिस छापामारी कएलक। पुलिस न्यायालयसँ सर्च वारंट प्राप्त कए कऽ ई कार्रवाई कएलक अछि।

तलाशी अभियानक दौरान पुलिसकेँ अलग-अलग पार्टनरशिप एग्रीमेंट, बैंक खातासँ संबंधित कागजात, वाहनक दस्तावेज आ वर्ष 2017क किछु ब्लैंक स्टांप पेपर भेटल अछि। पुलिस सभटा दस्तावेजक जांच कऽ रहल अछि। ब्लैंक स्टांप पेपर भेटबाक मामिलामे सेहो कानूनी कार्रवाईक तैयारी कएल जा रहल अछि।

मुजफ्फरपुरक एसएसपी कांतेश कुमार मिश्रा कहलनि जे अहियापुर थाना क्षेत्रक उगनडीहमे 20 अगस्तकेँ जमीनक बाउंड्री तोड़बाक शिकायत भेटल छल। एहि मामिलामे एखनि धरि 13 अलग-अलग केस दर्ज कएल जा चुकल अछि आ दू आरोपितकेँ गिरफ्तार कऽ जेल पठाओल जा चुकल अछि।

पुलिसक अनुसार, जांचक क्रममे विधायकक भाई सोनू सिंहक कथित भूमिका सेहो सामने आएल अछि। पुलिसक दावा अछि जे सोनू सिंह किछु युवकक संग घटनास्थल पर पहुंचल छल आ बाउंड्री तोड़बाक घटनामे शामिल छल। वीडियो फुटेजक आधार पर अन्य आरोपितक पहिचानक प्रयास चलि रहल अछि।

एसएसपी दावा कएलनि जे जांचक क्रममे विधायक अमित कुमार रानूक कथित संलिप्ततासँ जुड़ल साक्ष्य सेहो पुलिसकेँ भेटल अछि। पुलिस एहि मामिलाक जमीन कब्जासँ जुड़ल कथित संगठित नेटवर्क आ ‘प्रोटेक्शन गैंग’क कोणसँ सेहो जांच कऽ रहल अछि।

एसएसपी कांतेश कुमार मिश्रा कहलनि, “जांचकेँ जखन आगाँ बढ़ाओल गेल तऽ बेलसंडक माननीय विधायकक सेहो संलिप्तता भेटि रहल अछि। हुनका विरुद्ध हमरा सभ लग साक्ष्य उपलब्ध अछि। आइ हुनकर अहियापुर स्थित आवास पर छापामारी कएल गेल, जतऽसँ कतेको महत्वपूर्ण दस्तावेज भेटल अछि। भू-माफियाक विरुद्ध कार्रवाई जारी रहत।”

एहि बीच विधायकक भाई सोनू सिंहकेँ फरार बताओल जा रहल अछि। ओकर गिरफ्तारी लेल पुलिस लगातार संभावित ठामसभ पर छापामारी कऽ रहल अछि। मामिलासँ जुड़ल आर्थिक गतिविधिक जांच लेल आर्थिक अपराध इकाई (ईओयू)केँ सेहो पत्र पठेबाक तैयारी चलि रहल अछि।

पुलिस द्वारा लगाओल गेल आरोपक संबंधमे विधायक अमित कुमार रानूक पक्षसँ एखन धरि कोनो प्रतिक्रिया सामने नहि आएल अछि। पुलिस जांच पूरा भेलाक बादे एहि मामिलाक वास्तविक तस्वीर आरो स्पष्ट भऽ सकत।