एसएमई लेल ₹10 हजार करोड़क ग्रोथ फंड
कैबिनेट देलक मंजूरी, छोट-मध्यम उद्योगकेँ भेटत दीर्घकालीन पूंजी
नव दिल्ली । समदिया
प्रधानमंत्री नरेंद्र मोदीक अध्यक्षतामे केंद्रीय कैबिनेट मंगलदिन 10 हजार करोड़ टाकाक एसएमई ग्रोथ फंड स्थापित करबाक मंजूरी देलक। एकर उद्देश्य छोट आ मध्यम उद्यमकेँ विकासक लेल पूंजी उपलब्ध करेनाइ आ मैन्युफैक्चरिंग, सेवा, तकनीक, नवाचार आ रणनीतिक क्षेत्रमे भारतीय कंपनीक विस्तारकेँ बढ़ावा देनाइ अछि।
सरकारक अनुसार, वर्तमानमे छोट उद्यम सभ लेल इक्विटी फंडक व्यवस्था अछि, मुदा विकासक चरणमे पहुँचि गेल एसएमई लेल दीर्घकालीन रिस्क कैपिटलमे कमी छल। नव फंड एहि वित्तीय अंतरकेँ दूर करैत सफल आ संभावनाशील एसएमईकेँ ‘पेशेंट ग्रोथ इक्विटी कैपिटल’ उपलब्ध कराओत।
सरकारक कहब अछि जे ई पहल ‘विकसित भारत 2047’क लक्ष्यक अनुरूप घरेलू पूंजी बाजारकेँ मजबूत करत आ भारतीय एसएमईकेँ वैश्विक स्तरपर प्रतिस्पर्धी बनेबाक अवसर देत।