लोकतंत्र कमजोर भेल त’ एंटी-इन्कंबेंसी सेहो समाप्त : राहुल गांधी

पटना । समदिया

कांग्रेस नेता आ लोकसभामे विपक्षी नेता राहुल गांधी चुनावी प्रक्रिया आ वोटक सुरक्षापर सवाल उठबैत कहलनि जे लोकतंत्र कमजोर पड़ल त’ संविधान, कानून आ लोकतांत्रिक संस्थासभ सेहो प्रभावित होएत। ओ कहलनि जे भारतमे एंटी-इन्कंबेंसी सरकारक विरुद्ध जनताक स्वाभाविक प्रतिक्रिया रहल अछि, मुदा लोकतंत्रक अभावमे ई प्रभाव नहि देखाइत अछि।

राहुल गांधी आरोप लगौलनि जे चुनावसभमे गड़बड़ीक शिकायत लगातार सामने आबि रहल अछि आ वोटक सुरक्षा सुनिश्चित करब चुनाव आयोगक जिम्मेदारी अछि। ओ कहलनि जे वोट कमजोर भेल त’ ओकर असरि पूरा लोकतांत्रिक व्यवस्थापर पड़ि सकैत अछि।

ई बयान एहेन समयमे आएल अछि, जखनि चुनाव आयोगक भीतर एसआईआर, मतदाता पंजीकरण आ वोटर डेटासँ संबंधित किछु मुद्दापर आयुक्तसभक बीच मतभेदक खबरि सामने आएल अछि। रिपोर्टक अनुसार, चुनाव आयुक्त सुखबीर सिंह संधू आ विवेक जोशी पछिला 10 महिनामे किछु निर्णयपर आपत्ति दर्ज करौलनि।

रिपोर्टमे फॉर्म-6 मे एसआईआरसँ संबंधित प्रश्न जोड़ल जाएब सहित मतदाता सूचीमे नाम जोड़ब-हटायब आ डेटा सुरक्षाक मुद्दाक उल्लेख अछि। हालाँकि, चुनाव आयोग एहि आरोपसभकेँ खारिज करैत कहलक जे आंतरिक टिप्पणी, सुझाव आ समीक्षा बहु-सदस्यीय संवैधानिक संस्थाक सामान्य कार्यप्रक्रियाक हिस्सा अछि आ सभ कार्रवाई कानूनक अनुरूप कएल जा रहल अछि।