महागठबंधनक पटनामे ‘आक्रोश मार्च’क आगाज

पटना । समदिया

बिहारमे चुनावी प्रक्रियामे कथित गड़बड़ीक विरोधमे इंडिया गठबंधनक तरफसँ बुधदिन पटनामे ‘ज्ञानेश भगाउ, लोकतंत्र बचाउ’ अभियानक तहत आक्रोश मार्च निकालल गेल। राजद प्रदेश कार्यालयसँ शुरू भेल मार्च वीरचंद पटेल पथ होइत इनकम टैक्स गोलंबर पहुँचल, जतय प्रधानमंत्री नरेंद्र मोदी, गृह मंत्री अमित शाह आ मुख्य निर्वाचन आयुक्त ज्ञानेश कुमारक नामक पुतला दहन कएल गेल।

मार्चमे गठबंधनक नेता-कार्यकर्ता चुनाव आयोग आ केंद्र सरकारक विरोधमे नारा लगेलनि। राजद प्रवक्ता एजाज अहमदक अनुसार, बिहारक 534 प्रखंडमे सेहो आक्रोश मार्च आ पुतला दहन कार्यक्रम आयोजित भेल। गठबंधनक नेतासभ बिहारमे फेर चुनाव करबाक मांग उठबैत आंदोलन जारी रखबाक बात कहलनि।

आइ शहीद स्मारकसँ राजभवन मार्च

राजद प्रवक्ता बतौलनि जे आइ 8 अक्टूबरकेँ तेजस्वी प्रसाद यादवक नेतृत्वमे राजभवन मार्च निकालल जाएत। ई मार्च प्रातः 11 बजे शहीद स्मारकसँ शुरू भऽ राजभवन धरि जाएत। एहिमे इंडिया गठबंधनक विभिन्न दलक सांसद, विधायक, विधान पार्षद आ कार्यकर्ता सहभागी होएत।

गठबंधनक नेतासभ आरोप लगौलनि जे चुनाव आयोग भाजपा सरकारक प्रभावमे काज कऽ रहल अछि आ बिहारमे एसआइआरक माध्यमसँ लोकतांत्रिक प्रक्रियाकेँ प्रभावित करबाक प्रयास भेल अछि।