मनीगाछीमे पुलिस टीम पर हमला, ASI घायल

सरकारी वाहन पर पथरावसँ शीशा क्षतिग्रस्त, छह नामजद पर मामिला

दरभंगा । समदिया

मनीगाछी थाना क्षेत्रक बघान्त गाममे शराब आ नशाक विरुद्ध कार्रवाई करय गेल पुलिस टीम पर स्थानीय लोकक द्वारा हंगामा आ पथराव करबाक मामिला सामने आयल अछि। घटनामे एकटा ASI घायल भेलाह, जखनकि पुलिसक सरकारी वाहनक शीशा पथरावसँ क्षतिग्रस्त भऽ गेल।

पुलिसक अनुसार, बुध राति बघान्त गामक पासवान टोलामे किछु लोकक शराबक नशामे हंगामा करबाक सूचना भेटल छल। थानाध्यक्ष रंजीत कुमार सिंहक नेतृत्वमे पहुंचल पुलिस टीम तीन लोककेँ हिरासतमे लेने छल। एहि क्रममे अजय पासवान पुलिससँ उलझि गेल आ हंगामा करैत हिरासतमे लेल गेल लोककेँ छुड़ा लेलक। एहि मामिलामे मनीगाछी थानामे कांड संख्या 267/26 दर्ज कऽ अजय पासवान सहित छह नामजद आ अन्य अज्ञात लोककेँ आरोपी बनाओल गेल।

बृहस्पति राति आरोपीक गिरफ्तारी लेल पुलिस टीम फेर बघान्त पहुंचल आ अजय पासवानकेँ गिरफ्तार कऽ सरकारी वाहनसँ लऽ जा रहल छल। पुलिसक अनुसार, एहि दौरान किछु लोक पुलिससँ धक्का-मुक्की करय लागल। गामसँ करीब दू किलोमीटर आगाँ चारि बाइक पर सवार लोक पहुँचल आ पुलिस वाहन पर पथराव करय लागल, जाहिसँ अगिला शीशा क्षतिग्रस्त भऽ गेल। घटनामे ASI राजेश सिंहक हाथमे चोट आयल।

पुलिसक अनुसार, वाहनमे सवार अजय पासवान पिछला शीशामे पैर मारि ओकरा तोड़ि देलक आ चलैत गाड़ीसँ बाहर कूदि गेल। पुलिस बल ओकरा पकड़ि लेलक। चोट लगलाक बाद ओकरा इलाज लेल DMCHक कैदी वार्डमे भर्ती कराओल गेल। घायल ASIक इलाज मनीगाछी सामुदायिक स्वास्थ्य केन्द्रमे भेल।

बेनीपुर SDPO बासुकीनाथ झा कहलनि जे पुलिस वाहन क्षतिग्रस्त करबाक आ पुलिसकर्मीकेँ घायल करबाक घटनामे संलग्न लोकनिक विरुद्ध कार्रवाई कएल जाएत। पुलिसक अनुसार शराब कारोबार आ नशामे हंगामा करयवला लोकक विरुद्ध अभियान जारी रहत।