भारत 15 अगस्त 2047 धरि बनत दुनियाक सर्वश्रेष्ठ राष्ट्र : अमित शाह
गोवा । समदिया
केंद्रीय गृह मंत्री अमित शाह कहलनि जे 15 अगस्त 2047 धरि भारत दुनियाक सर्वश्रेष्ठ राष्ट्र बनत। प्रधानमंत्री नरेंद्र मोदी द्वारा 2047 धरि भारतकेँ विकसित राष्ट्र बनेबाक जे संकल्प राखल गेल अछि, ओकरा पूरा करबाक लेल देशक प्रत्येक नागरिककेँ योगदान देबाक आवश्यकता अछि।
गोआ पुलिसकेँ ‘प्रेसिडेंट्स कलर्स’ प्रदान करबाक अवसर पर बंबोलिमक श्यामा प्रसाद मुखर्जी स्टेडियममे आयोजित कार्यक्रमकेँ संबोधित करैत अमित शाह कहलनि जे गोआ पुलिस लेल ई सम्मान गर्वक विषय अछि। आठ दशकक गौरवशाली सेवा, पेशेवर उत्कृष्टता, साहस, अनुशासन आ समर्पणक कारण गोआ पुलिसकेँ ई सम्मान भेटल अछि।
अमित शाह कहलनि जे गोआ पुलिसक जिम्मेदारी सुरक्षित शहर, सुरक्षित समुदाय आ सुरक्षित समुद्री सीमा सुनिश्चित करब अछि। विकसित राष्ट्र लेल आंतरिक आ सीमाक सुरक्षा सुनिश्चित होयब पहिल शर्त अछि। गोआक नमहर समुद्री सीमाक सुरक्षामे सेहो गोआ पुलिसक महत्वपूर्ण भूमिका अछि।
गृह मंत्री देशक अमर शहीद सभकेँ स्मरण करैत कहलनि जे हुनकर बलिदान आ देशक प्रति समर्पण गोआ पुलिसकेँ ई गौरव प्राप्त करयमे महत्वपूर्ण रहल अछि।
ओ कहलनि जे वर्तमान समयमे वैश्विक स्तर पर भारतक कूटनीतिक प्रभाव लगातार बढ़ि रहल अछि। रूस-यूक्रेन युद्ध आ गल्फ क्षेत्रमे संघर्षक कारण विश्वक आर्थिक व्यवस्था प्रभावित भेल, मुदा भारत संवाद आ रणनीतिक साझेदारीक माध्यमसँ अपन आर्थिक विकासकेँ कायम रखलक। हुनका अनुसार, चालू वित्त वर्षक पहिल तिमाहीमे भारतक जीडीपी वृद्धि दर 7.8 प्रतिशत रहल।
अमित शाह कहलनि जे आब दुनियामे कोनो पैघ समस्या होए, सभक नजरि एहि बात पर रहैत अछि जे एहि विषय पर भारतक प्रधानमंत्रीक दृष्टिकोण की अछि। हुनकर अनुसार, प्रधानमंत्री नरेंद्र मोदी विश्वमे भारतकेँ पुनः महत्वपूर्ण सम्मान आ प्रभाव दियेबाक काज कयलनि।
ओ कहलनि जे 2047 मे स्वतंत्रताक 100 वर्ष पूरा होयत, तखनि भारतकेँ प्रत्येक क्षेत्रमे विश्वमे अग्रणी बनयबाक लक्ष्य अछि। देशक नागरिककेँ विश्वास अछि जे 15 अगस्त 2047 धरि भारत वास्तवमे दुनियाक सर्वश्रेष्ठ राष्ट्र बनत।
