ब्रिक्स सम्मेलनमे व्यापार-निवेश सहयोगकेँ नव गति

भारतक अध्यक्षतामे वैश्विक दक्षिणक सहयोग पर बढ़ल भरोसा

नई दिल्ली । समदिया

भारतक अध्यक्षतामे आयोजित ब्रिक्स शिखर सम्मेलनक दौरान रूस, मिस्र सहित ब्रिक्स आ ब्रिक्स-प्लस देशक उद्योग जगत आ संस्थागत प्रतिनिधि भारतक बढ़ैत आर्थिक भूमिका, निवेशक अवसर आ वैश्विक दक्षिणक बीच सहयोग पर भरोसा व्यक्त कयलनि। प्रतिनिधिसभक अनुसार ब्रिक्स मंच व्यापार, निवेश, आधारभूत संरचना, कौशल विकास आ तकनीकी सहयोगकेँ नव दिशा दऽ सकैत अछि।

रूसक जीएसबीआई लिमिटेडक संस्थापक आ सीईओ अलेक्जेंडर कोकोव सम्मेलनक सकारात्मक वातावरणक प्रशंसा करैत कहलनि जे बी2बी बैठकक माध्यमसँ विभिन्न देशक उद्यमीकेँ प्रत्यक्ष संवादक अवसर भेटल। हुनकर अनुसार भारत आ रूसक बीच व्यापार आ निवेशक क्षेत्रमे व्यापक संभावना अछि आ दुनू देश मजबूत आर्थिक साझेदारीक दिशामे आगाँ बढ़ि रहल अछि।

रूसक स्किल डेवलपमेंट एजेंसीक उपनिदेशक अलीना सिंह कहलनि जे ब्रिक्स विभिन्न अर्थव्यवस्था आ संस्कृतिक देशकेँ साझा चुनौतीक समाधान लेल एकटा मंच पर अनैत अछि। अनुभव आ विशेषज्ञताक आदान-प्रदानसँ सामूहिक विकासकेँ गति देल जा सकैत अछि।

रशियन हेलीकॉप्टर्स ग्रुपक अंतरराष्ट्रीय विपणन प्रबंधक मैक्सिम एंड्रियानोव भारतक अध्यक्षता आ आतिथ्यक प्रशंसा करैत कहलनि जे सम्मेलनक दौरान नव कारोबारी संपर्क बनल अछि आ कतेको परियोजना पर चर्चा शुरू भेल अछि। हुनका अनुसार ब्रिक्स बिजनेस काउंसिल सेहो कारोबारी सहयोग बढ़ाबयमे प्रभावी रहल।

प्रिस्टीन लॉजिस्टिक्स एंड इंफ्राप्रोजेक्ट्स लिमिटेडक परोमा मुंशी रेबेलो कहलनि जे आधारभूत संरचना मूल रूपसँ निवेशसँ जुड़ल विषय अछि। ब्रिक्सक अतिरिक्त मिस्र, इथियोपिया आ इंडोनेशिया जेकाँ ब्रिक्स-प्लस देशमे सेहो निवेश आ आधारभूत संरचनाक अवसर पर ध्यान देबाक आवश्यकता अछि।

मिस्रक इस्क्रा मेडेन फॉर इन्वेस्टमेंट एंड एग्रीकल्चरल डेवलपमेंटक प्रतिनिधि इस्लाम सालेम कहलनि जे कृषि, प्रौद्योगिकी, वित्त सहित विभिन्न क्षेत्रमे साझेदारीक व्यापक संभावना अछि। हुनकर अनुसार संयुक्त परियोजना, निजी निवेश आ तकनीकी सहयोगमे निजी क्षेत्रक भूमिका निर्णायक भऽ सकैत अछि।