बिहारमे करीब ४ हजार माफियाक संपत्ति जब्ती लेल ८०० प्रस्ताव पठाओल गेल न्यायालय
पटना । समदिया
बिहारमे माफिया आ संगठित अपराधसँ जुड़ल लोकक विरुद्ध पुलिसक कार्रवाई तेज कएल जा रहल अछि। पुलिस करीब ४ हजार एहेन लोकक पहिचान कएने अछि, जिनकर संपत्ति जब्त करबाक प्रक्रिया आगाँ बढ़ाओल जा रहल अछि। एहि मामिलामे करीब ८०० प्रस्ताव न्यायालय पठाओल जा चुकल अछि। ई जानकारी सोम, ७ सितंबरकेँ लॉ एंड ऑर्डर एडीजी केएस अनुपम देलनि।
एडीजीक अनुसार, विभिन्न जिलासँ संपत्ति जब्ती लेल प्रस्ताव प्राप्त भेल अछि। न्यायालयमे प्रस्ताव गेलाक बाद आगाँक कार्रवाई कानूनी प्रक्रियाक तहत होइत अछि आ आरोपित पक्षकेँ अपन पक्ष रखबाक अधिकार रहैत अछि। एहि सूचीमे चिराग पासवानक पार्टीक विधायक अमित रानूक नाम सेहो हेबाक बात कहल गेल अछि।
पुलिस गंभीर मामिलाक सुनवाईपर नजरि रखबाक लेल ट्रायल मॉनिटरिंग सिस्टम आ महत्वपूर्ण अर्थात् ‘लैंडमार्क केस’ पर विशेष ध्यान देत। एकर उद्देश्य मुकदमाक प्रगतिक लगातार निगरानी करब आ प्रभावी पैरवी सुनिश्चित करब अछि।
एडीजी ईहो कहलनि जे कार्रवाईसँ जुड़ल लोकक कॉन्टैक्ट ट्रेसिंग सेहो कएल जा रहल अछि। पुलिस चारि हजारसँ बेसी लोकक ट्रेसिंग कए चुकल अछि, जखनि कि करीब ३० लोकक ट्रेसिंग एखनि बाकी अछि।
