बिहारमे UCC पर जदयू असहमत, अमित शाहसँ भेट करताह संजय झा
पटना । समदिया
समान नागरिक संहिता (UCC) लागू करबाक केंद्रीय गृह मंत्री अमित शाहक घोषणा पर बिहारमे सत्तारूढ़ जनता दल यूनाइटेड (JDU) अपन आपत्ति स्पष्ट कए देलक अछि। JDU महासचिव श्याम रजक कहलनि जे कोनो परिस्थितिमे बिहारमे UCC लागू नहि होबय देल जाएत।
मुंबईमे अमित शाह कहने छलाह जे 2029 धरि NDA शासित सभ 21 राज्यमे UCC लागू कएल जाएत। एहि बयानक बाद JDU सतर्क भ’ गेल अछि। पार्टीक कार्यकारी राष्ट्रीय अध्यक्ष संजय झा UCC मुद्दा पर गृह मंत्री अमित शाहसँ शीघ्र भेट करबाक लेल समय मांगलनि अछि। JDU केर राष्ट्रीय प्रवक्ता राजीव रंजन सेहो कहलनि जे संजय झा एहि विषय पर अमित शाहसँ बातचीत करताह।
बिना व्यापक विचार-विमर्शक पक्षमे नहि JDU
JDU सूत्रक अनुसार पार्टीक विरोध UCC पर चर्चासँ नहि, बल्कि व्यापक विचार-विमर्शक बिना एकरा लागू करबाक तरीकासँ अछि। मुख्यमंत्री नीतीश कुमार सेहो पहिने विधि आयोगकेँ पत्र लिखि UCC केँ जल्दबाजी अथवा जबरन लागू नहि करबाक पक्षमे अपन मत राखि चुकल छथि। JDU सभ धर्म, धार्मिक अल्पसंख्यक, राज्य सरकार आ अन्य हितधारकक संग व्यापक विमर्शक पक्षधर रहल अछि।
दोसर दिसि, TDP सेहो UCC पर अपन पुरान सावधानीपूर्ण रुख पर कायम अछि। पार्टी मसौदा पर व्यापक चर्चा आ बहसक बादे अंतिम निर्णयक पक्षमे रहल अछि।
बीजेपीक सूत्रक मानब अछि जे सहयोगी दलक ई रुख पहिनेसँ रहल अछि। UCC जेकाँ संवेदनशील मुद्दा पर बीजेपी सहयोगी दलसभकेँ संग ल’ कए चलबाक प्रयास करत। आब सभक नजरि JDU आ अमित शाहक प्रस्तावित भेट पर अछि, जतए UCC पर सहयोगी दलक आपत्ति आ केंद्रक रणनीतिक बीच सहमतिक बाट निकालबाक प्रयास भ’ सकैत अछि।
