बाढ़िकेँ राष्ट्रीय आपदा घोषित करबाक मांग पर तेजस्वीक पीएमकेँ पत्र, मंत्री शैलेंद्रक पलटवार
पटना । समदिया
बिहार विधानसभामे नेता प्रतिपक्ष तेजस्वी यादव प्रधानमंत्री नरेंद्र मोदीकेँ दू पन्नाक पत्र लिखि बिहारमे आयल विनाशकारी बाढ़िकेँ राष्ट्रीय आपदा घोषित करबाक मांग केलनि अछि। ओ पीएमसँ बिहारक तत्काल दौरा करबाक संग राज्यकेँ 5 हजार करोड़ टाकाक विशेष वित्तीय सहायता देबाक आग्रह केलनि।
तेजस्वी पत्रमे कहलनि अछि जे बिहारक करीब 20 जिला बाढ़िसँ प्रभावित अछि आ लाखों लोक भोजन, शुद्ध पेयजल, दवाई, बिजली, पशुचारा आ सुरक्षित आवागमन जकाँ मूलभूत सुविधाक लेल संघर्ष कऽ रहल छथि। हुनकर आरोप अछि जे बिहार सरकार आ एनडीएक केंद्रीय मंत्री-सांसद बाढ़ि पीड़ितक सहायता लेल अपेक्षित ढंगसँ केंद्रक समक्ष अपन मांग नहि उठा रहल छथि।
तेजस्वी केंद्रसँ प्रभावित क्षेत्रमे अतिरिक्त नाव आ अन्य संसाधन उपलब्ध कराबय, सेना आ वायुसेनाक हेलीकॉप्टरक सहयोग सुनिश्चित करय, प्रभावित किसान, मजदूर, पशुपालक आ परिवारकेँ विशेष आर्थिक सहायता देबाक मांग केलनि। संगहि राज्यक वित्तीय आ आपदा प्रबंधनक तैयारी तथा आकस्मिक निधिक उपयोगक स्वतंत्र समीक्षा अथवा CAG परीक्षण करबाक आग्रह सेहो केलनि।
तेजस्वी दीर्घकालीन समाधानक लेल ‘फ्लड रेजिलिएंस मिशन’ शुरू करबाक मांग करैत कहलनि जे नदी आ तटबंध प्रबंधन, जलनिकासी, जलाशयक पुनर्जीवन, आधुनिक बाढ़ि पूर्वानुमान प्रणाली तथा नेपाल, बांग्लादेश आ पड़ोसी देशसभक संग प्रभावी जल प्रबंधन नीति एहि मिशनक हिस्सा होए।
मंत्री शैलेंद्रक तेजस्वी पर पलटवार
तेजस्वीक पत्र पर बिहार सरकारक पथ निर्माण मंत्री इंजीनियर कुमार शैलेंद्र पलटवार करैत कहलनि जे तेजस्वी लग कोनो मुद्दा नहि अछि, तें ओ नब-नब नैरेटिव तैयार करैत छथि। ओ तेजस्वीकेँ लालू यादवक विरासतमे राजनीति भेटबाक बात कहैत हुनकर बयान पर सवाल उठौलनि।
मंत्री कहलनि जे मुख्यमंत्री सम्राट चौधरी बाढ़िक पहिल दिनसँ सक्रिय छथि। ओ हवाई सर्वेक्षण करबाक संग विभिन्न जिलामे अधिकारीसभक संग समीक्षा बैठक केलनि। हुनकर अनुसार मुख्यमंत्रीक पहलसँ फरक्का बांधक गेट खुलल, जाहिसँ बिहपुर विधानसभा क्षेत्रकेँ बाढ़िक गंभीर संकटसँ बचाओल जा सकल।
शैलेंद्र कहलनि जे गंगा नदीक बढ़ैत जलस्तर आ कटावक बीच राघोपुर बांध टूटलाक बाद सेहो सरकारक प्रयाससँ क्षेत्रकेँ बचाओल गेल। नदीमे स्टीमर लगाओल गेल आ धार मोड़बाक प्रयास कएल गेल।
मंत्री दावा केलनि जे मुख्यमंत्री सम्राट चौधरी आ उपमुख्यमंत्री विजय चौधरी लगातार बाढ़िक स्थिति पर नजरि रखने छथि एवं प्रभावित लोकसभकेँ राहत पहुंचाओल जा रहल अछि। टूटल तटबंधक मरम्मति सेहो तेजीसँ जारी अछि।
