बाढ़ि पीड़ितक लेल नितिन नवीन देलनि तीन मासक वेतन

नई दिल्ली । समदिया

बिहारमे बाढ़िसँ प्रभावित लोकक सहायता लेल भाजपा राष्ट्रीय अध्यक्ष नितिन नवीन मुख्यमंत्री राहत कोषमे अपन तीन मासक वेतनक राशि 6 लाख 35 हजार टाका अंशदान केलनि। ओ कहलनि जे संकटक एहि घड़ीमे प्रभावित परिवारक संग सरकार मजबूतीसँ ठाढ़ अछि।

नितिन नवीन कहलनि जे बाढ़ि प्रभावित परिवारसभकेँ प्रति परिवार 7 हजार टाकाक हिसाबे एखनि धरि 550 करोड़ टाकासँ बेसी वित्तीय सहायता देल गेल अछि। प्रभावित क्षेत्रमे राहत शिविर, सामुदायिक रसोई, चिकित्सा सुविधा आ पशु लेल चारा आदिक व्यवस्था कएल गेल अछि। बचाव कार्यमे एनडीआरएफ आ एसडीआरएफक टीम तैनात अछि।

ओ कहलनि जे किसानक फसल क्षतिक आकलनक काज सेहो चलि रहल अछि आ आवश्यक सहायता देबाक प्रक्रिया जारी अछि। केंद्र सरकारक सहयोगक उल्लेख करैत नितिन नवीन कहलनि जे केंद्रीय मंत्री शिवराज सिंह चौहान बाढ़ि प्रभावित क्षेत्रक दौरा कऽ पीड़ित लोकसँ भेंट कएलनि आ राहत-बचाव कार्यक जायजा लेलनि।