पीएम मोदी रोजगार मेलामे 51 हजारसँ बेसी युवाकेँ देताह नियुक्ति पत्र
नव नियुक्त कर्मचारी केन्द्र सरकारक विभिन्न मंत्रालय आ विभागमे करताह योगदान
नई दिल्ली । समदिया
प्रधानमंत्री नरेंद्र मोदी आइ 19 सितंबरकेँ 20म रोजगार मेलाक अवसर पर 51 हजारसँ बेसी नव नियुक्त युवाकेँ नियुक्ति पत्र प्रदान करताह। प्रधानमंत्री दुपहरिया 12.30 बजे वीडियो कॉन्फ्रेंसिंगक माध्यमसँ नियुक्ति पत्र वितरण करताह आ नव चयनित अभ्यर्थीसभकेँ संबोधित सेहो करताह। रोजगार मेला देशभरिमे 45 स्थान पर आयोजित होयत।
नव नियुक्त कर्मचारी केन्द्र सरकारक विभिन्न मंत्रालय आ विभागमे योगदान देताह। एहिमे राजस्व विभाग, रेल मंत्रालय, गृह मंत्रालय, स्वास्थ्य एवं परिवार कल्याण मंत्रालय, वित्तीय सेवा विभाग आ रक्षा मंत्रालय सहित अन्य विभाग शामिल अछि।
सरकारक अनुसार, रोजगार मेला युवासभकेँ सरकारी सेवामे नव अवसर उपलब्ध कराबैत अछि। 20म रोजगार मेलाक संग-संग एहि पहल माध्यमसँ विभिन्न सरकारी विभाग आ संगठनमे करीब 12.75 लाख युवाकेँ नियुक्ति पत्र देल जा चुकल अछि।
एहिसँ पहिने 23 मईकेँ 19म रोजगार मेला आयोजित भेल छल, जाहिमे 51 हजार लोककेँ नियुक्ति पत्र प्रदान कएल गेल छल।
प्रधानमंत्री मोदी रोजगार मेलाक पिछला अवसर पर कहने छलथि जे भारतक युवा ‘विकसित भारत’क यात्राकेँ गति देबामे महत्वपूर्ण भूमिका निभा रहल छथि। हुनकर अनुसार, सरकार युवासभकेँ नव अवसर उपलब्ध करा सशक्त बनेबाक दिशामे लगातार काज कऽ रहल अछि।
प्रधानमंत्री कहलनि जे स्वच्छ ऊर्जा, महत्वपूर्ण खनिज, हरित हाइड्रोजन आ टिकाऊ विनिर्माणसँ जुड़ल क्षेत्र तेजीसँ विकसित भऽ रहल अछि। स्वीडन, नॉर्वे आ इटली सहित विभिन्न देशक संग ‘ग्रीन ट्रांजिशन एंड सस्टेनेबल टेक्नोलॉजी’ क्षेत्रमे बढ़ैत सहयोगसँ भारतमे भविष्यक उद्योग आ रोजगारक नव अवसर बनि रहल अछि।
ओ कहलनि जे 2047 धरि विकसित भारतक निर्माणक लक्ष्य प्राप्त करबाक लेल देशक विभिन्न क्षेत्रमे निवेश कएल जा रहल अछि, जाहिसँ युवासभ लेल रोजगारक लाखों नव अवसर सृजित भऽ रहल अछि।
