पटनाक मरीन ड्राइव गोलंबरक नाम रामविलास पासवानक नाम पर करबाक मांग
अरुण भारती CM सम्राट चौधरीसँ भेंट कऽ रखलनि आदमकद प्रतिमाक प्रस्ताव
पटना । समदिया
पटना जेपी गंगा पथ स्थित मरीन ड्राइव गोलंबरक नामकरण पद्म भूषण स्व. रामविलास पासवानक नाम पर करबाक आ ओतय हुनकर आदमकद प्रतिमा स्थापित करबाक मांग तेज भऽ गेल अछि। एहि मांगकेँ लऽ कऽ लोक जनशक्ति पार्टी (रामविलास)क सांसद सह बिहार प्रभारी अरुण भारती, प्रदेश अध्यक्ष सुरेंद्र विवेक आ राष्ट्रीय महासचिव सह राष्ट्रीय मीडिया प्रभारी धीरेंद्र कुमार मुन्ना मुख्यमंत्री सम्राट चौधरीसँ भेंट कयलनि।
नेतासभ मुख्यमंत्रीसँ मरीन ड्राइव गोलंबरक नाम ‘पद्म भूषण श्रद्धेय रामविलास पासवान गोलंबर’ रखबाक आग्रह कयलनि। संगहि ओतय हुनकर भव्य आदमकद प्रतिमा स्थापित करबाक मांग सेहो राखल गेल।
अरुण भारती कहलनि जे मरीन ड्राइव बिहारक बदलैत तस्वीर, विकास आ आधुनिकताक प्रतीक बनि गेल अछि। एहेन महत्वपूर्ण स्थल पर रामविलास पासवानक स्मृतिकेँ स्थायी रूप देब हुनकर सार्वजनिक जीवन आ योगदानक प्रति सम्मान होयत। हुनका अनुसार मुख्यमंत्री सम्राट चौधरी एहि मांगकेँ गंभीरतापूर्वक सुनलनि आ सकारात्मक निर्णयक आशा अछि।
अरुण भारती मुख्यमंत्रीसँ भेंटक तस्वीर सोशल मीडिया पर साझा करैत कहलनि जे रामविलास पासवान करीब पाँच दशक धरि गरीब, दलित आ पिछड़ा वर्गक अधिकार आ सम्मान लेल संघर्षरत रहलाह।
चिराग पासवान सेहो पठा चुकल छथि पत्र
एहिसँ पहिने लोजपा (रामविलास)क राष्ट्रीय अध्यक्ष सह केंद्रीय मंत्री चिराग पासवान 31 अगस्तकेँ मुख्यमंत्री सम्राट चौधरीकेँ पत्र लिखि मरीन ड्राइव गोलंबरक नाम रामविलास पासवानक नाम पर रखबाक आ हुनकर आदमकद प्रतिमा लगयबाक मांग कयने छलाह।
रामविलास पासवान नौ बेर लोकसभा आ दू बेर राज्यसभा सदस्य रहलाह। ओ छह प्रधानमंत्रीक मंत्रिमंडलमे केंद्रीय मंत्रीक रूपमे महत्वपूर्ण जिम्मेदारी निभेलनि। राष्ट्र लेल हुनकर योगदानक लेल हुनका मरणोपरांत पद्म भूषणसँ सम्मानित कयल गेल।
