नीतीश समर्थनमे उतरथि तऽ प्रत्याशी वापस लेत जन सुराज : प्रशांत किशोर

पटना । समदिया

जन सुराजक संस्थापक आ बांकीपुरक विधायक प्रशांत किशोर मंगलदिन पटना शिक्षक निर्वाचन क्षेत्रसँ पार्टी प्रत्याशी डॉ. दिव्या ज्योतिक नामांकनमे शामिल भेलाह। एहि दौरान ओ जेडीयूक स्नातक प्रत्याशी नीरज कुमारपर निशाना साधैत कहलनि जे यदि मुख्यमंत्री नीतीश कुमार स्वयं नीरज कुमारक समर्थनमे कैमरा पर आबि कऽ वोट माँगथि, तँ जन सुराज अपन प्रत्याशी वापस लऽ लेत।

प्रशांत किशोर कहलनि जे नीरज कुमार एतेक वर्ष एमएलसी रहलाक बादो शिक्षककेँ वेतनमान नहि दियबा सकलाह आ सामाजिक मुद्दापर नहि बाजबाक कारण आब कोन मुँहसँ वोट माँगि रहल छथि। हुनकर दावा छल जे शिक्षक आ स्नातक मतदातासभ सम्राट चौधरीक विरोधमे मतदान करबाक मन बना लेने छथि।

जन सुराज पटना स्नातक क्षेत्रसँ अनंत सिंहक करीबी डॉ. अनुज सिंहकेँ प्रत्याशी बनौने अछि। प्रशांत किशोर शिक्षकसभकेँ लोकसभा चुनाव 2029 सँ पहिने सातम वेतनमान देबाक आ स्नातक क्षेत्रक 10 हजार शिक्षित बेरोजगार युवाकेँ रोजगार देबाक आश्वासन सेहो देलनि।

ओ कहलनि जे बिहारमे बेहतर शिक्षा, शिक्षककेँ सम्मान आ वेतनमान चाही तँ जन सुराजकेँ विजयी बनेबाक आवश्यकता अछि।