जनसुराज नेताकेँ पटनामे मारलक पाँच गोली, हालत गंभीर
पटना । समदिया
बुद्ध कॉलोनी थाना क्षेत्रमे बुधदिन अपराधी सभ जनसुराज पार्टीक नेता आ वार्ड नंबर-24 केर पूर्व पार्षद अनिल कुमार यादव पर ताबड़तोड़ गोली चलौलक। हमलामे अनिल यादवकेँ करीब पाँच गोली लागल अछि। गंभीर हालतमे हुनका अस्पतालमे भर्ती कराओल गेल अछि।
घटनास्थलसँ आठ खोखा बरामद
प्रत्यक्षदर्शीक अनुसार, अपराधी सभ कतेको राउंड गोली चलाकऽ हथियार लहरबैत फरार भऽ गेल। घटनाक सूचना भेटिते पुलिस घटनास्थल पर पहुँचि जाँच शुरू केलक। पुलिसकेँ घटनास्थलसँ आठटा खोखा भेटल अछि। हमलावरक पहिचान लेल आसपासक सीसीटीवी फुटेज खंगालल जा रहल अछि।
केंद्रीय एसपी ममता कल्याणी कहलनि जे अनिल यादवकेँ पाँच गोली लागल अछि आ हुनकर हालत गंभीर अछि। पुलिस गोलीबारीक कारण आ एहि घटनामे शामिल लोकक संबंधमे जाँच कऽ रहल अछि।
प्रशांत किशोर आ तेजस्वी अस्पताल पहुँचलाह
घटनाक जानकारी भेटलाक बाद जनसुराज पार्टीक नेता प्रशांत किशोर आ बिहार विधानसभामे विपक्षी नेता तेजस्वी यादव अस्पताल पहुँचलाह। दुनू नेता अनिल यादवसँ भेंट कऽ हुनकर हालचाल बुझलनि।
अनिल यादव वार्ड नंबर-24 केर पूर्व पार्षद छथि आ वर्तमान पार्षद ज्ञानवती देवीक पति छथि। पुलिस हमलावरक गिरफ्तारी लेल छानबीनमे जुटल अछि।
