आब विपक्षी दलक नाम, चुनाव चिह्न आ बैंक खाता लूटल जा रहल : टीएमसीक नाम-चिह्न फ्रीज पर तेजस्वी
पटना । समदिया
टीएमसीक नाम आ पारंपरिक चुनाव चिह्न ‘फूल आ घास’ केर आगामी उपचुनाव लेल फ्रीज करबाक मुद्दा पर बिहार विधानसभामे नेता प्रतिपक्ष तेजस्वी यादव भाजपा आ चुनाव आयोग पर निशाना साधलनि। सोशल मीडिया ‘एक्स’ पर पोस्ट करैत ओ कहलनि जे विधायक-सांसद तोड़लाक बाद आब विपक्षी दलक नाम आ चुनाव चिह्न पर सेहो कब्जा करबाक प्रयास भऽ रहल अछि।
तेजस्वी यादव आरोप लगौलनि जे भाजपा संवैधानिक संस्थाक सहयोगसँ विपक्षी दलक विधायक-सांसद तोड़ल, सरकार सभ बदलल आ आब दलक नाम, चुनाव चिह्न आ बैंक खाताक दावेदारी धरि पहुँचि गेल अछि। हुनकर कहब छल जे शिवसेना, एनसीपी आ एलजेपीक बाद टीएमसीक मामिलामे सेहो ओही तरहक घटनाक्रम देखाइत अछि।
लोकसभामे विपक्षी नेता राहुल गांधी सेहो एहि मुद्दा पर चुनाव आयोग आ भाजपा पर सवाल उठौलनि। ओ कहलनि जे शिवसेना, एनसीपी आ आब टीएमसीक मामिलामे एक्के तरहक पैटर्न देखाइत अछि। राहुल गांधीक अनुसार, चुनाव आयोगक संवैधानिक जिम्मेदारी जनादेश आ स्वतंत्र-निष्पक्ष चुनावक रक्षा करब अछि।
