पप्पू यादव कहलनि जे चुनाव केर देखैत कांग्रेस पार्टी बिहारमे १५ जनवरीक बाद अपन संगठनक विस्तार पर ध्यान देत। ओ बिहारमे कांग्रेसक भूमिका पर जोर दऽ रहल छथि।
पूर्णियाक सांसद पप्पू यादव रवि दिन आगामी बिहार विधानसभा चुनावक बारेमे बड़का बयान देलनि। महागठबंधनमे कांग्रेसक भूमिकाक वकालत करैत पप्पू यादव स्पष्ट शब्दमे कहलनि जे २०२५क बिहार विधानसभा चुनावमे कांग्रेसकेँ पैघ भायक भूमिका भेटबाक चाही, नहि तँ महाराष्ट्रवाला स्थिति होयत।
लोकसभा सत्रक बीचमे अपन संसदीय क्षेत्रमे आयल पूर्णियाक सांसद पप्पू यादव अर्जुन भवन कार्यालयमे संवाददाता सबसँ कहलनि कि आबय वाला २०२५ मे बिहारमे चुनाव गठबंधनक तहत होएत।
ओ कहलनि जे बिहारक क्षेत्रीय दलकेँ हरियाणा आ महाराष्ट्रसँ सीखबाक आवश्यकता अछि। ओ कहलनि जे, “मुख्यमंत्री कियो होइथ, गठबंधन तय करबाक नेतृत्व राहुल गाँधीक हाथमे होय।”
ओ कहलनि, “नरेंद्र मोदीक खिलाफ लड़य केर ताकत जँ केकरोमे अछि तऽ ओ राहुल गांधी आ प्रियंका गांधीमे अछि। ताहि लेल बिहारमे चुनाव गठबन्धनक नेतृत्वमे होयबाक चाही, मुदा एकर नेतृत्व कांग्रेसकेँ करबाक चाही। कांग्रेसकेँ पैघ भायक भूमिका निभाबय केर चाही, नहि तँ महाराष्ट्र जँका स्थिति बनि जायत।
पप्पू यादव कहलनि जे चुनाव केर देखैत कांग्रेस पार्टी १५ जनवरीक बाद बिहारमे अपन संगठनक विस्तार पर ध्यान देत। सांसद इहो कहलनि जे बिहारमे पेपर लीक पर्यायवाची बनि गेल अछि, जकरा रोकबाक लेल कांग्रेसक नेतृत्ववला महागठबंधन सरकार आवश्यक अछि। गौरतलब अछि जे झारखंड आ महाराष्ट्र चुनावक नतीजाक बाद राजनीतिक दलक नजरि बिहार चुनावपर अछि।
महाराष्ट्रमे भाजपा गठबन्धनमे अपन सहयोगी दलक सङ्ग सहजतासँ सरकार बनौने अछि, जखन कि झारखण्डमे हेमन्त सोरेनक नेतृत्वमे महागठबंधनक सरकार बनल अछि। पप्पू यादव झारखण्ड चुनावमे सेहो बहुत सक्रिय देखल गेलाह आ गठबन्धनक स्टार प्रचारकक भूमिकामे देखल गेलाह। ओतय केर लगभग ८० प्रतिशत सीट जे गठबंधन जीतल अछि, ओतय पप्पू यादव कैंपेन कयने छलथि। तेँ पप्पू यादव कांग्रेसक भूमिका पर जोर दऽ रहल छथि।
