पश्चिम बंगालमे वक्फ कानून केर लऽ कऽ जारी विरोध प्रदर्शनक बीच मुख्यमंत्री ममता बनर्जी मंगलकेँ राज्यक मुस्लिम समुदायकेँ आश्वासन देलथि जे हुनक सरकार हुनक संपत्तिक सुरक्षा सुनिश्चित करत।
जैन समुदाय द्वारा आयोजित विश्व नवकार महामंत्र दिवसक अवसर पर एकटा सभाकेँ संबोधित करैत ममता भाजपा पर निशाना साधलीह आ राज्यमे एकता बनौनिहारक वकालत कयलथि। ममता अपन संबोधनमे कहलथि, “हम बंगालमे वक्फ बिल लागू नहि होबय देब। हमर सरकार धार्मिक आधार पर बंगालक विभाजन नहि होबय देत। हम जानैत छी जे वक्फ अधिनियम लागू होयबासँ अहाँ दुखी छी, मुदा भरोसा राखू, बंगालमे एहेन किछु नहि होयत। बंगालमे फूट डालू आ राज करू केर नीति नहि चलत। अहाँकेँ ‘जियो और जीने दो’ केर संदेश देबाक चाही।
ओ कहलीह बंगालमे रहनिहार सभक सुरक्षा देनाइ हमर काज अछि। हम अहाँ सभसँ अपील करैत छी जे जँ कियो अहाँकेँ राजनीतिक रूपसँ इकट्ठा होएबाक लेल उकसाबैत अछि तँ कृपया एहेन नहिं करू।कृपया याद राखू जे दीदी अहाँ एवं अहाँक संपत्तिक रक्षा करत। जँ हमसभ संग रहब, तऽ हम संसार जीत सकैत छी।
सीएम बनर्जी आगू कहलनि, “किछु लोक पुछैत अछि जे हम सभ धर्मक स्थान पर कियेक जाइत छी। हम कहलौंह जे हम अपन पूरा जीवन कालमे ओहिठाम जाइत रहब। चाहे अहाँ हमरा गोली मारि दिअ, मुदा अहाँ हमरा एकतासँ अलग नहि कऽ सकब।
ओ आगू कहलीह जे बांग्लादेशक स्थिति देखू, हमर मानब अछि जे एकरा एखनि पारित नहि कएल जयबाक छल। बंगालमे विभाजन नहि होएत, जिबू आ जीबय दियौ। जँ ककरो हमर संपत्ति लेबाक अधिकार नहि अछि, तऽ हम कोना कहि सकी जे ककरो दोसरक संपत्ति लेल जा सकैत अछि ? हमरा 30 प्रतिशत (मुसलमान) केँ संग लऽ कऽ चलय पड़त। याद राखू, दीदी अहाँक संपत्तिक रक्षा करत।”
ओ आगू कहलीह जे, “हमर उद्देश्य जोड़नाइ अछि, बाँटनाइ नहि। जखनि हम एकजुट रहब, तऽ देश आगू बढ़त। हमर नीति अछि जे जिबू आ जीबय दियौ। किछु लोक बंगालकेँ बदनाम कऽ रहल अछि, कहैत अछि जे हम राज्यमे हिंदू धर्मकेँ संरक्षण नहि दैत छी। तऽ फेर सबकेँ संरक्षण के दैत अछि ? हमरा बंगालक अल्पसंख्यककेँ श्रेय देबाक चाही जे राज्यमे हिंदू त्योहार सेहो मनाबैत अछि।हमरा ई कहैत गर्व होइत छैक जे ई बंगाल अछि आ हम सभ धर्मक सम्मान करैत छी।”
जनतब जे संसदक दुनू सदनसँ बजट सत्रमे पारित वक्फ (संशोधन) विधेयक 2025 केँ राष्ट्रपति द्रौपदी मुर्मू द्वारा मंजूरी भेटि गेल अछि आ ई कानून देशमे लागू भऽ गेल अछि। विपक्षी दल आ किछु मुस्लिम संगठनक विरोध केर बावजूद लोकसभा 3 अप्रैलकेँ आ राज्यसभा 4 अप्रैलकेँ एकरा मंजूरी प्रदान कएलक अछि। लोकसभामे एकर समर्थनमे 288 आ विरोध मे 232 वोट पड़ल छल जखनिकि ऊपरक सदनमे एकर पक्षमे 128 आ विरोधमे 95 वोट पड़ल छल।
