संदीप फाउंडेशन/युनिवर्सिटी केर चेयरमैन प्रसिद्ध शिक्षाविद डाॅ. संदीप झासँ शुक्रकेँ मैपुप्र केर प्रधान संपादक अजय नाथ झा शास्त्रीक नाशिकक संदीप युनिवर्सिटीमे भेटघांटक क्रममे विस्तृत चर्चा भेल। अजय नाथ झा शास्त्री अपन बेटी जया झाकेँ युनिवर्सिटी कैंपस देखाबय लऽ गेल छलथि। एहि क्रममे बातचीतक किछु अंश शास्त्री मैपुप्र समदियाकेँ बतेलनि।
शास्त्री कहलनि जे, “किछु वर्ष पहिने हम नाशिकक संदीप फाउंडेशन कैंपस गेल छलौंह, यद्यपि ओहू समय ओकर विशालता आकर्षित कयने छल, मुदा एखनि एक तरहसँ मानू संदीप साम्राज्य स्थापित भऽ गेल अछि, जाहिमे उच्च शिक्षाक प्रायः अनेक विधाक सभ फैसिलिटीसँ युक्त विश्वस्तरीय शिक्षा हब बनि गेल अछि।” शास्त्रीक मोताबिक संदीप झा कहलनि जे, “एतय नहिं मात्र देशक कोना-कोनासँ छात्र-छात्रा उच्च शिक्षा प्राप्त कय रहल अछि, बल्कि विदेशक सेहो अनेको देशक विद्यार्थी अध्ययन कऽ रहल छथि।”
ज्ञात भेल जे संदीप फाउंडेशन एवं युनिवर्सिटीमे उच्च शिक्षाक अनेक विधा अर्थात कोर्स उपलब्ध अछि, जेना :- इंजीनियरिंगक लेल : इंजीनियरिंग इन आइटी, कंप्यूटर, इलेक्ट्रॉनिक्स एंड टेलीकम्युनिकेशन, मेकेनिकल, सिविल, इलेक्ट्रिकल, एआइडीएस, ऑटोमेशन एंड रोबोटिक्स। इंजीनियरिंगक अतिरिक्त एमबीए, फार्मेसी, पोलिटेकनिक, जुनियर काॅलेज- साइंस एंड काॅमर्स, एनिमेशन एंड डिजाइन, मिडिया, मास कम्युनिकेशन, जर्नलिज्म आदि आदि।
शास्त्री कहलनि जे “संगहि अत्यंत प्रसन्नताक बात जे इहो ज्ञात भेल कि आब मेडिकल कोर्स सेहो शिघ्र शुरू होएत, ताहि लेल व्यापक स्तरक तैयारी शुरू भऽ रहल अछि।”
शास्त्री आगू कहलनि जे अपन मिथिलाक सिजौलक संदीप युनिवर्सिटीक सेहो चर्चा भेल। संदीप झा कहलखिन जे, “ओतय सेहो आइ प्रायः सम्पूर्ण बिहारक उच्च शिक्षाक शिक्षार्थी शिक्षा ग्रहण कऽ रहल छथि। मिथिलामे एहि स्तरक सुविधा भेलासँ आब बहुत रास मध्यम वर्गक विद्यार्थीक आस सेहो पुरा भऽ रहल छनि।”
शास्त्रीक मोताबिक बहुत किछु करए चाहैत छथि संदीप झा, बस लोककेँ कनी दृष्टिकोण बदलय पड़त आ परस्पर सहयोगात्मक भाव आनय पड़त।
संगहि शास्त्री कहलनि जे “मिथिलावासीक लेल खुशखबरी पर खुशखबरी सभ अछि। शिक्षा क्षेत्रमे परचम फहरेलाक बाद रोजगार लेल रोजगार मेला आदि उपक्रम तहिना मैथिल समन्वय समितिक माध्यमसँ वर-वधू परिचय सम्मेलन आदि अनेक सामाजिक उत्थानक लेल प्रयासक बाद आब ज्ञात भेल अछि जे आब स्वास्थ्य क्षेत्रमे डेग बढ़ाबैत मिथिलामे सभ सुविधासँ युक्त हाॅस्पिटल केर प्रयास भऽ रहल अछि आ सेहो पटल पर शिघ्र आओत। एतबय नहिं आर बहुत रास योजना अछि जे एकटा समर्थ व्यक्तित्वे पुरा कय सकैत अछि आ ताहि सभक लेल संदीप झा कृत-संकल्पित बुझेलथि, मिथिला-मैथिलीसँ संबंधित हर प्रकारक सुझाव पर सकारात्मक छथि, मुदा ताहि लेल मिथिलावासीकेँ सेहो अपनामे विकासशील परिवर्तन आनय पड़त, अन्यथा चाहियो कऽ बहुत किछुमे अवरोध आबैत रहैत छैक।
शास्त्री आगा कहलनि, एहिना बहुत रास चर्चा भेल, जयाकेँ सेहो अनेक टिप्स आ मार्गदर्शन कयलनि, फलतः ओहो उत्साहित भेल आ संबंधित शिक्षाक प्रति लगन आ रुचि आओर बढ़लैक, कैंपस भ्रमण कय आ बहुत किछु ज्ञात भेलाक बाद संदीप युनिवर्सिटीक विशालता आ महत्वक प्रत्यक्ष अनुभव भेलै।
विश्वस्त सूत्रसँ इहो ज्ञात भेल जे आबयवाला मैथिल समन्वय समितिक समारोहमे राज्यसभा सांसद संजय झा’क प्रायः उपस्थिति रहतनि।
