विद्यापति सेवा संस्थानक तत्वावधानमे बुधदिन परशुराम जयंती मनाओल गेल। संस्थानक प्रधान कार्यालयमे आयोजित कार्यक्रममे उपस्थित लोक भगवान परशुरामक चित्र पर फूलक माला अर्पित क’ हुनक कृतित्व आ व्यक्तित्वकें याद कयलनि। अक्षय तृतीयाक दिन आयोजित एहि कार्यक्रममे परंपरा अनुसार आगंतुक आ बटोही केर स्वागत नेबो शरबत पीया कयल गेल।
मैथिली अकादमीक अध्यक्ष पं कमला कांत झाक अध्यक्षतामे आयोजित कार्यक्रममे विद्यापति सेवा संस्थानक महासचिव डा बैद्यनाथ चौधरी बैजू कहलनि जे भगवान परशुराम न्याय केर देवता छलाह। ओ अपन जीवनमे संसारक संरक्षण करबा लेल शस्त्र आ शास्त्र केर उपयोगिता पर बल देने छलाह। डा बैजू कहलनि जे भगवान परशुराम अपन वंशजे नहि, अपितु समस्त सनातन धर्मावलंबीक देवता छथि। जनमानसकेँ प्रभु परशुराम सदृश शस्त्र आ शास्त्र केर ज्ञान ओ बोध होयबाक चाही, ताकि प्रकृति केर संतुलन बनल रहय।
मौका पर मीडिया संयोजक प्रवीण कुमार झा कहलनि जे भगवान परशुराम केर जीवन तप, ज्ञान, शौर्य, संघर्ष, न्याय, सदाचार, स्वाभिमान, स्वावलंबन आ आत्मनिर्भरताक एकटा अद्भुत आ प्रेरणादायी उदाहरण अछि।
अध्यक्षीय संबोधनमे पं कमला कांत झा समाजमे नव जान फूँकबा लेल एकता कायम करबा पर बल दैत युवा पीढ़ीकेँ एहि तरहक आयोजनसँ महापुरुष लोकनि द्वारा कयल महान कार्यक प्रेरणा लेबाक सुअवसर बतेलनि। ओ समाज आ देशक सर्वांगीण विकास लेल सभ कोटिक लोककें एक मंच पर अयबाक आह्वान कयलनि।
कार्यक्रममे प्रो चंद्रशेखर झा बूढाभाई, विनोद कुमार झा, डा गणेश कांत झा, दुर्गा नंद झा, सुशील कुमार झा, मनीष झा रघु, इंद्रमोहन झा, नवल किशोर झा, संजय पंजियार, सुशील कुमार सुमन, संतोष कुमार झा, आशीष चौधरी, मणिभूषण राजू, पुरूषोत्तम वत्स आदि केर उल्लेखनीय उपस्थिति रहल।
