दरभंगा समदिया
*
हुनक बयानकेँ भ्रामक बतबैत पृथक मिथिला राज्यक गठनक मांगकें जायज ठहरेलक
मिथिला राज्यक पृथक गठन केर मुद्दा पर बिस्फीक विधायक हरिभूषण ठाकुर बचौल द्वारा देल गेल विवादास्पद बयान केर बाद हुनक बयानक कड़गर निंदा संग पृथक मिथिला राज्यक गठन केर मांग एक बेर फेरसँ जोर पकड़य लागल अछि। विद्यापति सेवा संस्थान शनिदिन भाजपा विधायक बचौलक बयानकें भ्रामक बतबैत एकर कड़गर निंदा कयलक आ एहि मुद्दा पर सभ मिथिला आ मैथिली सेवी संस्थानकें एक मंच पर आबि आंदोलनकें तेज करबाक आह्वान कयलक।
संस्थानक दिसिसँ निंदा प्रस्ताव पारित करैत महासचिव डा बैद्यनाथ चौधरी बैजू कहलनि जे बिस्फी केर विधायककें ई बूझबाक चाही जे मिथिला केर सामाजिक, आर्थिक, सांस्कृतिक, राजनैतिक, शैक्षणिक, साहित्यिक आ भाषा केर क्षेत्रमे समग्र विकास लेल पृथक मिथिला राज्यक गठन निहायत जरूरी अछि। कारण सांस्कृतिक संपन्नता लेल दुनिया भरिमे विख्यात मिथिला आइ सरकारी उपेक्षाक कारण लगातार आर्थिक पिछड़ापनक शिकार होयबा लेल मजबूर भ’ रहल अछि।
ओ हरिभूषण ठाकुर केर बयानकें भ्रामक बतबैत कहलनि जे भाषा, लिपि, क्षेत्र, जनसंख्या आ ऐतिहासिक पृष्ठभूमि सन सभ मानक पर खरा उतरैत मिथिला पूर्ण राज्य बनबाक अधिकार रखैता अछि आ ई समय केर मांग सेहो अछि। तें हुनका अपन एहि विरोधाभासी बकलेल बयान पर सार्वजनिक रूपसँ माफी मांगबाक चाही।
मैथिली अकादमीक पूर्व अध्यक्ष पं कमला कांत झा बचौल केर बयानकें बचकाना बतबैत कहलनि जे मिथिला कहियो देश छल आ आइ ओछ राजनीति केर शिकार भ’ राज्यक दर्जा हासिल करबामे सेहो पिछड़ि रहल आछि। मैथिली भाषा-साहित्यक विकास संरक्षण केर अभावमे प्रभावित भ’ रहल अछि। मिथिलाक अपन सबसँ पुरान भाषा मैथिली अछि जकर अपन लिपि मिथिलाक्षर आइयो जीवित अछि। बावजूद एकर मैथिलीक प्रति सरकारी स्तर पर चलि रहल षडयंत्र केर कारण ई संविधानक आठम अनुसूचीमे शामिल भेला बादो राजकाज आ प्राथमिक शिक्षाक भाषा बनबासँ वंचित अछि। ओ बचौल द्वारा अपन बयानसँ एकरा धार्मिक आ सांप्रदायिक रंग देबाक सेहो तीव्र भर्त्सना कयलनि।
प्रो जीवकांत मिश्र बिस्फी केर विधायकक बयानकें दिवालिया मानसिकताक उपज बतबैत कहलनि जे हुनका सन लोककें जोशमे होश गमेबासँ परहेज करैत मिथिला मैथिली केर सर्वांगीण विकासक लेल डेगसँ डेग मिला संग चलबाक चाही। गलत बयानवाजी करबाक बजाय रोजगारक अभावक दंश झेलैत मिथिलाक मजदूर आइयो पलायन करबाक लेल किएक विवश भ’ रहल एहि दर्दकें बूझबाक चाही।
डा महेंद्र नारायण राम कहलनि जे अपन उम्रक सेहो लेहाज करैत बिस्फीक विधायककें मिथिलामे स्थापित चीनी मिल, पेपर मिल, जूट मिल आदि आइ किएक एतय कबारक ढेरी मात्र बनल अछि, एहि बारेमे सोचबाक चाही।
मीडिया संयोजक प्रवीण कुमार झा विधायक बचौल केर बयानक निंदा करैत कहलनि जे मिथिला केर सर्वांगीण विकास लेल पृथक मिथिला राज्यक गठन केर मांग समय सापेक्ष अछि। कोरोना संकट केर घड़ीमे सरकारी उपेक्षाक कारण लगातार आर्थिक पिछड़ापनक शिकार होयबा लेल मजबूर भ’ रहल एहि क्षेत्रक लोकक घरमुँहा पलायन सबहक पोल खोलि क’ राखि देने छल।
बिस्फी विधायक केर बयानक विनोद कुमार झा, डा गणेश कांत झा, मणिभूषण राजू, पुरुषोत्तम वत्स, श्याम किशोर राम, जय नारायण साह, दुर्गा नन्द झा, मिथिलेश ठाकुर, ममता ठाकुर, डा सुषमा झा, गिरधारी झा आदि सेहो तीव्र भर्त्सना एवं निंदा कयलनि।
