राजधानी पटनामे अपराधी बेरोकटोक भऽ गेल अछि। कखनो लूट, कखनो डकैती आ कखनहु हत्या। दू दिन पहिने अपराधी सब गर्दनीबाग थाना क्षेत्रक सरिस्ताबदक पेट्रोल पंपसँ ३४ लाख रुपया लूटक घटनाक अंजाम देने छल, तऽ दोसर तरफ पॉश क्षेत्र कंकड़बागमे बैंक मैनेजरक घरमे सेहो लाखोक संपत्ति लूटि लेलक। बृहस्पति कऽ अपराधीसभ एक बेर फेर कंकड़बागमे रंजीत राम नामक गैस विक्रेताक दिनदेखाड़े गोली मारि हत्या कऽ देलक।
अपराधी सभ एलआईजी पार्क लग अनामिका गैस एजेंसीक विक्रेता रंजीत रामक माथमे गोली मारि देलक। हत्याक बाद क्षेत्रमे अफरातफरीक माहौल बनि गेल अछि। एहि घटनाक बाद गैस विक्रेताक परिवार कानि रहल अछि। स्थानीय लोक एहि घटनासँ बहुत क्रोधित छथि आ पुलिसक कार्यप्रणालीसँ नाखुश छथि। लोकक कहब छनि जे मृतक रंजीत राम पिछला २० सालसँ एहि क्षेत्रमे गैस सिलेंडर बाँटि रहल छलाह।
घटनाक बाद सदर एएसपी स्वीटी शेहरावत घटनास्थल पर पहुँचि आ सीसीटीवी फुटेजक आधार पर अपराधी तक पहुँचबाक दावा कऽ रहल छथि। राजधानी पटनामे पछिला तीन दिनमे भेल तीनटा पैघ घटना पुलिसक कार्यप्रणाली पर एकटा पैघ सवाल उठौलक अछि। ई चुनावक समय अछि आ एहन समयमे राजधानी पटना लेल अतिरिक्त बल सेहो उपलब्ध करायल गेल अछि, मुदा एकर बावजूद राजधानीमे घटित घटना राजधानीक जनतामे हुनकर सुरक्षाक चिंता बढ़ा देलक अछि।
