२०४७ धरि विकसित भारतक निर्माणक लेल बुनियादी ढाँचा, निवेश, नवाचार आ समावेशिता पर ध्यान केन्द्रित : केन्द्रीय वित्त मंत्री

नई दिल्ली
*

केन्द्रीय वित्त आ कॉरपोरेट मामिलाक मंत्री निर्मला सीतारमण कहलनि जे नरेन्द्र मोदीक नेतृत्ववला सरकार २०४७ धरि भारतकेँ एकटा विकसित राष्ट्र बनेबाक लेल बुनियादी ढाँचा, निवेश, नवाचार आ समावेशिताक चारिटा प्रमुख क्षेत्र पर ध्यान केन्द्रित कऽ रहल अछि। वित्त मंत्री सीतारमण ई बात पेंसिल्वेनिया विश्वविद्यालयक व्हार्टन स्कूलक छात्रसभक सङ्ग बातचीतक क्रममे कहलनि।

वित्त मंत्रीक कार्यालय बुधदिन जारी एकटा वक्तव्यमे कहलक जे केन्द्रीय वित्त मंत्री निर्मला सीतारमण अंतर्राष्ट्रीय मुद्रा कोष (आईएमएफ) आ विश्व बैंकक वार्षिक बैसारमे भाग लेबाक लेल मंगलदिन एतय पहुँचलीह। वित्त मंत्री न्यूयॉर्कसँ वाशिंगटन डीसी तक कारसँ अयलीह। एहि दरम्यान ओ पेनसिल्वेनिया विश्वविद्यालयमे रुकल छलीह, जतय ओ छात्रसभसँ बातचीत कयलनि।

ओ कहलनि जे २०४७ धरि भारतकेँ एकटा विकसित राष्ट्र बनयबाक लेल नरेन्द्र मोदीक नेतृत्ववला सरकार चारिटा प्रमुख क्षेत्र, बुनियादी ढाँचा, निवेश, नवाचार आ समावेशिता पर ध्यान केन्द्रित कऽ रहल अछि।

व्हार्टन स्कूलक छात्रसभक सङ्ग बातचीतमे ओ कहलनि जे केन्द्र सरकारक ५१ सँ बेसी मंत्रालय आ विभाग प्रत्यक्ष लाभ हस्तांतरण (डीबीटी) सँ जुड़ल अछि। पछिला ८ सालमे ४५० अरब अमेरिकी डॉलरसँ बेसी हस्तांतरित कयल गेल अछि। वित्त मंत्री कहलनि जे ८ सालमे लगभग ४० अरब अमेरिकी डॉलरकेँ चोरीसँ बचायल गेल अछि। ओ कहलनि जे भारतक ई डिजिटल अनुभव चोरी, धोखाधड़ी लेनदेन आ फर्जी खाताधारककेँ कम करबामे एकटा पैघ सबक अछि। एहिसँ करदाताक पाइक प्रति उत्तरदायी होयबामे हमरा सभकेँ बहुत लाभ भेटैत अछि।

सीतारमण छात्रसँ कहलनि, जाहि साल हम ब्रिटिश शासनसँ स्वतंत्रताक १००म वर्षगाँठ मना रहल होएब, अर्थात २०४७ मे, हम एकटा विकसित देश बनय चाहैत छी आ आकांक्षा रखैत छी। एहि उद्देश्यकेँ प्राप्त करबाक लेल वित्त मंत्री कहलनि जे सरकार बुनियादी ढाँचा, निवेश, नवाचार आ समावेशिताक चारिटा प्रमुख क्षेत्रक पहिचान कयलक अछि। ओ कहलनि जे एकरा अतिरिक्त चारि वर्ग अर्थात किसान, महिला, युवा आ गरीबक आवश्यकता बुझबाक आ ओकरा पूरा करबाक आवश्यकता अछि। एकर संग ई सुनिश्चित करब अछि जे हुनका संसाधन आ अवसर तक पहुँच होय।

जनतब जे केन्द्रीय वित्त मंत्री निर्मला सीतारमण अमेरिकाक आधिकारिक यात्रापर छथि। सीतारमण वाशिंगटन डीसीमे अंतर्राष्ट्रीय मुद्रा कोष (आईएमएफ), विश्व बैंकक वार्षिक बैसार, जी-२० वित्त मंत्री, केन्द्रीय बैंकक गवर्नर (एफएमसीबीजी)क बैसार, जी-२० एफएमसीबीजीक संयुक्त बैसार, पर्यावरण मंत्री आ विदेश मंत्री आ जी-७-अफ्रीका मंत्रिस्तरीय गोलमेज सम्मेलनमे भाग लेतीह।