तिरहुत स्नातक निर्वाचन क्षेत्रसँ उपचुनावक परिणामक बाद सत्तारूढ़ दल आ विपक्षक समस्या बढ़ि गेल अछि। सवाल ई अछि जे २०२५ केर चुनावसँ पहिने की ई परिणाम एनडीए आ महागठबंधनक लेल रेड अलर्ट अछि ? निर्दलीय उम्मीदवार वंशीधर ब्रजवासी भारी जीत दर्ज कयलनि, जखन कि जदयू आ राजद उम्मीदवार हारि गेलाह। वंशीधर ब्रजवासीक जीतसँ बिहारमे राजनीतिक उथल-पुथल मचि गेल अछि।
कांग्रेस विधायक अजय सिंह कहलनि जे सरकार द्वारा शिक्षक पर कयल गेल अत्याचारक ई प्रभाव अछि। स्नातक निर्वाचन क्षेत्रक मतदाता शिक्षित आ जागरूक छथि। ओ वंशीधर पर विश्वास व्यक्त कयलनि जे अपन बेहतरी लेल शिक्षकक लड़ाई लड़लनि।ई तऽ सरकारकेँ बुझय पड़त जे एकर विरुद्ध कोन तरहक माहौल अछि। एहिसँ आम चुनावमे महागठबंधनकेँ कोनो नोकसान नहि होयत। नीतीश कुमार आ राजगक लेल चिंता अछि।
वंशीधरक जीतपर प्रतिक्रिया दैत भाजपा समर्थित बिहार विधान परिषदक निर्दलीय सदस्य सचिदानन्द राय कहलनि, “ई निश्चित रूपसँ एकटा पैघ बात अछि। कतहु ने कतहु शिक्षकलोकनिकेँ लगलनि जे ई हमरा सभक लेल एकटा आशा छथि आ ओ आवाज उठयताह। ओ कहलनि जे आम चुनावमे लोक कोनो व्यक्ति विशेषकेँ वोट दैत छथि मुदा शिक्षक, स्नातक आ स्थानीय निकाय क्षेत्र चुनावमे अपन मुद्दा पर वोट दैत छथि। बिहारमे एहि चुनाव परिणामक प्रभाव आम चुनावमे नहि देखल जायत। २०२५ मे एनडीए केर सरकार पुनः बनत।
एहि मामिला पर राष्ट्रीय जनता दल विधायक राहुल तिवारी कहलनि जे ई नीतीश सरकार लेल तनावक विषय अछि। हमरा लेल कोनो तनाव नहि अछि। सरकारक खिलाफ नाराजगी अछि। ई शिक्षकसभक सङ्ग जाहि तरहक व्यवहार कयल गेल, ओकर परिणाम अछि। ई बात जदयू आ सरकारकेँ बुझबाक अछि। हमरा लेल कोनो रेड अलार्म नहि अछि।
दोसर दिसि जदयू नेता आ प्रवक्ता अरविन्द निषाद कहैत छथि जे हम उपचुनावक परिणामक समीक्षा करब। निश्चित रूपसँ जखनि २०२६ मे तिरहुतमे चुनाव होयत तखनि हम एहि सीट पर जीतक झंडा गाड़ब। २०२५ केर चुनावमे हमरा लेल कोनो समस्या नहि अछि। ई चुनाव अलग पद्धतिक होइत अछि। ई आमचुनाव नहि अछि।
