आप्रवासन विभाग बहुत रास अवैध अप्रवासीकेँ गिरफ्तार कयलक। जाहि कारण दंगा भऽ गेल आ दंगाक दौरान किछु गाड़ीमे आगि लगा देल गेल। प्रदर्शनकारी पुलिस पर पथराव सेहो कयलक, जकरा पुलिस कड़ाईसँ निपटल। एहि सप्ताह लॉस एंजिलिससँ करीब 118 लोककेँ गिरफ्तार कएल गेल अछि।
जहियासँ डोनाल्ड ट्रंप अमेरिकामे सत्ता संभारनि तहियेसँ रोज किछु नै किछु हंगामा भऽ रहल अछि। आब अमेरिकाक लॉस एंजिलिसमे पिछला दू दिनसँ आप्रवासन छापेमारीक विरोध भऽ रहल अछि आओर पिछला दू दिनसँ अलग-अलग जगह पर हिंसा भड़कि रहल अछि। जाहिमे पुलिस बल प्रयोग कय भीड़केँ तितर-बितर कय देलक अछि। एही स्थितिकेँ संभारबाक लेल राष्ट्रपति डोनाल्ड ट्रंप आब नेशनल गार्डक दू हजार सैनिककेँ तैनात करबाक घोषणा कय देलनि अछि। एहि फैसलाक बाद विरोध प्रदर्शन हिंसक भऽ जयबाक संभावना अछि।
अमेरिकी रक्षा विभाग एहि विरोध प्रदर्शन पर कहलक, विरोध प्रदर्शन शुक्रसँ शुरू भेल छल। कतेको लोककेँ हिरासतमे लेल गेल छल। प्रदर्शनकारी एकरा “पैघ पैमाना पर अराजकता” आ “सैन्य कार्यवाही” बतौलक अछि। संघीय कानून प्रवर्तनक मदति केर लेल रक्षा विभाग नेशनल गार्डकेँ सक्रिय करय लागल अछि। रक्षा सचिव पीट हेगसेथ एक्स पर अपन पोस्टमे एही विरोध प्रदर्शनकेँ “हिंसक भीड़ हमला” बतौलनि। ओ कहलनि कि ई विरोध प्रदर्शन “अवैध अपराधी”केँ हटाबयमे बाधा पहुँचाबय केर कोशिश कय रहल अछि।
व्हाइट हाउस शनिदिन जारी बयानमे कहलक, ट्रंप कैलिफोर्नियामे अराजकता दूर करय लेल नेशनल गार्डकेँ तैनात कय रहल छथि। कैलिफोर्नियाक गवर्नर गेविन न्यूसम एही पर आपत्ति जतौलनि आ सोशल मीडिया पर एगो पोस्ट शेयर कय कहलनि कि ‘रिपब्लिकन राष्ट्रपति केर ई कदम जानिबूझि कय भड़काऊ अछि आ एकरासँ तनाव बढ़तै। ओ कहलनि जे, ई गलत मिशन अछि आ जन विश्वासकेँ नष्ट करत। स्थानीय प्राधिकारी कोनो समय कानून प्रवर्तन सहायता प्रदान करयमे सक्षम अछि।
जनतब जे आप्रवासन विभाग कतेको अवैध आप्रवासीकेँ गिरफ्तार कयलक। जाहि कारण दंगा भऽ गेल आ दंगाक दौरान किछु गाड़ीमे आगि लगा देल गेल। प्रदर्शनकारी पुलिस पर पथराव सेहो कयलक, जकरा पुलिस कड़ाईसँ निपटलक। दरअसल, एहि सप्ताह लॉस एंजिलिससँ करीब 118 लोककेँ गिरफ्तार कएल गेल अछि। ट्रंप प्रशासन अवैध आप्रवासीक खिलाफ कड़ा कार्यवाही कय रहल अछि आओर भारी संख्यामे अवैध आप्रवासीकेँ पकड़ि कय देशसँ निकालि देल गेल अछि। विभागाध्यक्षक अनुसार, हुनकर एजेंसी रोज करीब 1600 अवैध आप्रवासीकेँ गिरफ्तार कय रहल अछि।
