अमेरिकी राष्ट्रपति डोनाल्ड ट्रंप १२ देशकेँ निर्यात पर टैरिफ लगाबै वला चिट्ठी पर हस्ताक्षर कयलनि, जकरा सोमदिन भेजल जा सकैछ। मीडियासँ बात करैत अमेरिकी राष्ट्रपति कहलनि जे, जाहि देशमे ई पत्र भेजल जायत ओकर नाम सोमदिन स्वयं खुलासा होयत। ओ बजलाह, “हम किछु चिट्ठी पर हस्ताक्षर कयलौंह अछि, सोम दिन पठाओल जायत, संभवतः 12 टा चिट्ठी। अलग-अलग राशि, अलग-अलग टैरिफ। एक पत्र पठेबामे बहुत आसान अछि।”
ट्रंप ईहो संकेत देलनि कि किछू देश पर ‘पारस्परिक टैरिफ’ बढ़ाकेँ ७० प्रतिशत धरि कयल जा सकैत अछि। उम्मीद अछि जे एक अगस्तसँ इ लागू भऽ जाएत।
अप्रैलमे अमेरिकी राष्ट्रपति देश प्रवेश करयवाला अधिकांश सामान पर १० प्रतिशतक बेस टैरिफक घोषणा कयलनि। एकर संग-संग चीन जेहेन किछु देश लेल आओर अधिक दर तय कयल गेल ऊ। मुदा बादमे एहि बढ़ल टैरिफकेँ 9 जुलाई धरि टालि देल गेल।
वाशिंगटन दू देश (यूनाइटेड किंगडम आ वियतनाम) केर संग ‘व्यापार समझौता’ पर हस्ताक्षर कयलक।
एम्हर भारतक उच्च स्तरीय आधिकारिक प्रतिनिधिमंडल बिना कोनो अंतिम समझौताक वाशिंगटनसँ वापस आबि गेल छथि।एकर नेतृत्व मुख्य वार्ताकार राजेश अग्रवाल कयने छलाह। ई समझौता कृषि आ डेयरी उत्पादक व्यापारक संवेदनशील मुद्दाक संबंधमे कयल जायवाला छल, जकरा पर अमेरिका केर दबाव छल।
ओना एखनो आशाक किरण अछि। आशा अछि कि ९ जुलाईक समय सीमासँ पहिने दूनू देशक बीच उच्चतम राजनीतिक स्तर पर अंतरिम द्विपक्षीय व्यापार समझौता भऽ सकैत अछि।
भारतीय प्रतिनिधिमंडल अमेरिकाक संग अंतरिम व्यापार समझौता पर बातचीत करय लेल 26 जूनसँ 2 जुलाई धरि वाशिंगटनमे छल।
केंद्रीय वाणिज्य मंत्री पीयूष गोयलक अनुसार भारत कोनो समय सीमाक दबावमे ‘मुक्त व्यापार समझौता’ पर हस्ताक्षर करबामे जल्दबाजी नहि करत।
नई दिल्लीमे एकटा कार्यक्रममे बाजैत मंत्री पीयूष गोयल एहि बात पर जोर देलनि कि भारत राष्ट्रीय हितमे व्यापारिक सौदा करय लेल तैयार अछि मुदा ओ’ कहियो समय सीमाक संग व्यापारिक सौदाौमे बातचीत नहिं करैत अछि।
अमेरिका अपन कृषि आ डेयरी उत्पाद केर व्यापक बाजारक मांग कऽ रहल अछि, जे एकटा पैघ चुनौती अछि। भारतक लेल देशक छोट किसानक रोजी-रोटीक मुद्दा अछि, ताहि लेल एकरा संवेदनशील क्षेत्र मानल जाइत अछि।
भारत ९ जुलाईसँ पहिने अंतरिम समझौता कय राष्ट्रपति ट्रंप केर २६ प्रतिशत टैरिफसँ राहत लेबय केर कोशिश कय रहल अछि।
ओ टेक्सटाइल, लेदर आ जूता जेहेन अपन लेबर-इंटेंसिव एक्सपोर्टक लेल महत्वपूर्ण टैरिफ कन्सेशन पर सेहो जोर दऽ रहल अछि।
