तीन दिवसीय 52म मिथिला विभूति पर्व समारोह 13 नवंबरसँ

समारोहक सफल आयोजन लेल अनेक समिति गठित
*
दरभंगा समदिया
*

तीन दिवसीय 52म मिथिला विभूति पर्व समारोह 13 नवंबरसँ होयत। आयोजनक रूपरेखा तय करबाक लेल रविदिन विद्यापति सेवा संस्थानक आम सभा संस्थानक प्रधान कार्यालय परिसरमे भेल। संस्थानक कार्यकारी अध्यक्ष डाॅ बुचरू पासवानक अध्यक्षतामे आयोजित आमसभामे सभ सालक भांति एहि साल सेहो कवि कोकिल विद्यापतिक निर्वाण दिवस कार्तिक धवल त्रयोदशी तिथि तदनुसार 13 नवंबरसँ तीन दिवसीय समारोह आयोजित करबाक सर्वसम्मतिसँ निर्णय लैत आयोजनक सफलता लेल विभिन्न समितिक गठन कयल गेल। समारोहक मुख्य संरक्षक ललित नारायण मिथिला विश्वविद्यालयक कुलपति प्रो संजय कुमार चौधरीकें बनाओल गेल। जखनकि मिथिलाक सामाजिक, साहित्यिक एवं सांस्कृतिक संरक्षण ओ संवर्द्धन लेल समर्पित एहि गौरवशाली आयोजनक संरक्षक मंडलमे कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेय, एमएलएसएम कालेजक प्रधानाचार्य डा शंभु कुमार यादव, महात्मा गांधी शिक्षण संस्थानक चेयरमैन हीरा कुमार झा, अहमदाबादक प्रवासी मैथिल संतोष कुमार मिश्र सहित ट्राई कलर प्रोपर्टीज लिमिटेडक कार्यकारी निदेशक रंजन कुमार झाकेँ मनोनीत कयल गेल। आयोजनक सलाहकार समितिक अध्यक्ष पं कमला कांत झा, स्वागताध्यक्ष सुप्रीम कोर्टक ओजस्वी अधिवक्ता एवं मनीगाछी प्रखंडक उजान गामवासी आशुतोष मिश्र, स्वागत महासचिव प्रो. जीवकांत मिश्र बनाओल गेलाह। आयोजन समितिक अध्यक्ष सर्वसम्मतिसँ कामेश्वर सिंह दरभंगा संस्कृत विश्वविद्यालयक पूर्व कुलपति प्रो शशिनाथ झाकेँ एवं उपाध्यक्ष क्रमशः डा श्रीपति त्रिपाठी, डा महानंद ठाकुर, डा रमेश झा, अमरेन्द्र झा आ विनोद कुमार झाकेँ मनोनीत कयल गेल।कोषाध्यक्षक कमान एकबेर फेर डॉ गणेश कांत झाकेँ सौंपल गेल। जखन कि आय-व्यय पर्यवेक्षणक प्रभारी प्रवीण कुमार झा बनाओल गेलाह। संस्थानक मुख पत्रिका ‘अर्पण’ केर संपादक एकबेर फेर डॉ महेद्र नारायण राम एवं सहायक संपादक प्रवीण कुमार झाकेँ बनाओल गेल। कवि सम्मेलनक संयोजक रमेश झा, सह संयोजक प्रवीण कुमार झा आ विचार संगोष्ठी केर प्रभारी सर्वसम्मतिसँ फेर मणिकांत झा बनाओल गेलाह। शोभा यात्राक संयोजक विनोद कुमार झा आ सह संयोजक क्रमशः प्रो. विजय कांत झा, डा महानंद ठाकुर आ प्रो चंद्रशेखर झा बूढ़ा भाईकेँ बनाओल गेल। समारोहमे देल जाय बला विभिन्न सम्मानक लेल पं कमला कांत झाक अध्यक्षतामे तीन सदस्यीय कमेटी केर गठन कयल गेल। कमेटीमे बतौर सदस्य वरिष्ठ साहित्यकार डॉ महेन्द्र नारायण राम आ प्रवीण कुमार झा पुनः शामिल कयल गेलाह।