राजनीति

कृषि कानून पर धमकी देबय लेल अरुण जेटलीकें भेजल गेल छल : राहुल गांधीक आरोप

नई दिल्ली
*

लोकसभामे विपक्षक नेता राहुल गांधी आरोप लगौलनि अछि जे कृषि कानून पर विरोध प्रदर्शनक बीच अरुण जेटलीकें धमकी देबय लेल भेजल गेल छल। राहुल गांधी शनिदिन अखिल भारतीय कांग्रेस समितिक वार्षिक कानून सम्मेलनमे ई बात कहि रहल छलाह। राहुल गांधी कहलनि जे, हमरा मोन अछि जखनि हम कृषि कानूनक खिलाफ लड़ैत छलहुं आ ओ (अरुण जेटली) आब नहि छथि, ताहि लेल शायद हमरा ई बात नहि कहबाक चाही, मुदा हम कहब, अरुण जेटलीकें हमरा धमकी देबय लेल पठाओल गेल छल। ओ (जेटली) कहलनि जे जॅं अहाँ सरकारक विरोध करैत एहि रास्ता पर आगू बढ़ब तॅं हमरा सभकें अहां पर कार्यवाही करय पड़त। हम हुनका दिस तकलहुं आ कहलियनि जे हमरा नहि लगैत अछि जे अपने बुझैत छी से अहां ककरासॅं गप्प कय रहल छी, कारण हम सब कांग्रेसी छी, हम कायर नहि छी।’

एहि दौरान कांग्रेस सांसद सरकार पर लोकतांत्रिक संरचनाकें कमजोर करबाक आ चुनावी प्रक्रियाक अखंडतासॅं समझौता करबाक आरोप लगौलनि। ओ कहलनि, “हमरा सदिखन शक छल जे किछु गड़बड़ अछि। एकर शुरुआत गुजरातसॅं भेल। किछु राज्यमे कांग्रेसकें एक्कहुटा सीट नहि भेटल, जकर कोनो मतलब नहि छल। जखनि हम सब सवाल उठेलहुं तॅं हमरा सबकें कहल गेल जे एकर सबूत कतय अछि ?’

महाराष्ट्रक मतदाताक आंकड़ाक गहन जांचक हवाला दैत राहुल गांधी कहलनि जे, हम लाखों मतदाताक फोटो आ नामकें मैन्युअल रूपसॅं मिलान कयलहुं, एकटा क्षेत्रमे 6.5 लाख वोट पड़ल, जाहिमे सॅं 1.5 लाख नकली छल। चुनाव आयोगसॅं भौतिक प्रति हमरा सबकें भेटल, किया कि ओ हमरा सबकें इलेक्ट्रॉनिक कॉपी नहि देलनि।

राहुल गांधी कहलनि जे, चुनाव आयोग गायब भऽ गेल अछि। आब एकर अस्तित्व नहि अछि।

Spread the love