मिथिला पेंटिंगसँ उद्यमिताक प्रोत्साहन हेतु प्रतिबद्ध छथि मिथिला पेंटिंग कलाकार एवं युवा उद्यमी अमृता शाम्भवी।
अंतर्राष्ट्रीय महिला दिवसक अवसर पर महिला प्रशिक्षु सभकेँ प्रोत्साहित करय तथा महिला कलाकार आ’ उद्यमीकेँ सम्मानित करय लेल शनि दिन श्री वर्धमान उत्कृष्टता केंद्र, जमुईमे “थ्रेड्स ऑफ चेंज” नामक कार्यक्रमक आयोजन कयल गेल जाहिमे करीब 65 महिला भाग लेलीह।
कार्यक्रमक शुभारम्भ अतिथि लोकनिक स्वागतसँ भेल। तदुपरान्त अतिथिक रूपमे समारोहमे आमंत्रित विशेषज्ञ वक्ता लोकनि अपन अनुभव प्रशिक्षु सभक संग साझा कयलनि तथा हुनक मार्गदर्शन कयलनि।
एहि अवसर पर क़ृषि उद्यमी शिवानी जमुईमे अपन उद्यमशीलताक यात्राक अनुभव साझा केलनि। दोसर विशेषज्ञ वक्ता शर्मिली गारमेंट्सक विकासमे अपन विपणन आधारित हस्तक्षेपक अनुभव आ चुनौतीसँ सबके अवगत करौलनि। ओ कहलनि जे उच्च गुणवत्ता वाला काज परिधान व्यवसायकेँ तेजीसँ बढ़बैत अछि। ओ काजक सूक्ष्म विवरणकेँ बूझैक आवश्यकता पर बल देलनि।
एहि समारोहमे विशेषज्ञ वक्ताक रूपमे आमंत्रित मिथिला पेंटिंग कलाकार आओर युवा उद्यमी अमृता शाम्भवी मिथिला पेंटिंगक माध्यमसँ उद्यमिताक अपन यात्रा एवं अनुभव साझा केलनि तथा बाजार मूल्यक संदर्भमे कपड़ा पर मिथिला पेंटिंगक महत्व केर रेखांकित केलनि। अमृता कुर्ती, साड़ी, वॉलेट आदि पर कएल गेल मधुबनी पेंटिंग केर अपन काजक प्रदर्शन सेहो केलनि। ओ बतेलनि जे एहेन उत्पादक ऑनलाइन मांग बेसी छन्हि। ओ कहलनि जौं प्रशिक्षु अपन साड़ी, कुर्ती, सलवार आदि परिधान पर मिथिला पेंटिंग करै छथि त’ ओ कम प्रयासमे उच्च आय अर्जित क’ सकैत छथि।
कार्यक्रमक अंतिम वक्ता, एनआईएफटी, पटनाक मुस्कान कुमारी छलथि। ओ परिधानक क्षेत्रमे डिजाइनिंग आ कलाक काजक भूमिका पर प्रकाश देलनि। ओ प्रशिक्षु सभक संग विभिन्न प्रकारक पैटर्न, डिजाइन आ’ कढ़ाई केर काज सेहो साझा केलनि।
समारोहक अंतमे एसवीयूके केर टीम जेएम फाइनेंशियल फाउंडेशनक नेतृत्व – पूजा दवे आ आशीष अरोड़ा एवं जेके ट्रस्ट टीम – राम भटनागर आ दिशांतक प्रति आभार व्यक्त करैत समारोहक संचालक एवं समन्वयक विश्वेश कुमार द्वारा ममता गुप्ता, घनश्याम एवं अन्य सहयोगीकेँ सभ सत्रक संचालनमे योगदान हेतु धन्यवाद देलनि।
