ओना अपना सभ दिस कहलो जाईत छैक जे तीला संक्रान्ति तक ठंढ़ क्रमशः बढ़ैत-बढ़ैत चरम पर पहुंच जाईत अछि आ तकर बादसँ दिन एक-एक तील क्रमशः बढ़य लगैत अछि आ तहिना ठंढ़ कम होबय लागैत अछि , यद्यपि दिन २१ दिसम्बरक बादेसँ बढ़य लगैत छैक, मुदा ठंढ़क परिप्रेक्ष्यमे आम बोलचालमे कहल जाइत छैक जे तीला संक्रान्तिक बाद अर्थात १४/१५ जनवरीक बाद दिनक बढ़ब केर संग ठंढ़ घटब शुरु होईत छैक।
तहिना अपन मिथिला क्षेत्र सहित पुरा बिहारमे एखनि मौसमक रुझान दिन-प्रतिदिन बदलैत देखाई पड़ि रहल अछि। कतेको शहरमे कुहेसक चादर देखल जा रहल अछि। मौसम विभाग अगिला ३ सँ ४ दिन धरि कतेको जिलामे बरखा होयबाक भविष्यवाणी कयलक अछि। एहि अवधिमे तापमानमे गिरावट आबि सकैत अछि।
उत्तर भारत आइ-काल्हि भयंकर जाड़क सामना कऽ रहल अछि। कुहेसक संग शीतलहरसँ लोकक समस्या बढ़ि गेल अछि। संगहि बिहारमे लगातार ठंड कहर मचा रहल अछि। भयंकर जाड़क बाद राज्यमे बरखा लोकक समस्या दुगुना कऽ देलक अछि। मौसम विभाग कतेको राज्यमे बरखाक चेतावनी जारी कयलक अछि। बिहारक मौसम विभागक अनुसार अगिला तीन दिन धरि किछु जिलामे हल्लुक बरखा भऽ सकैत अछि। विभागक अनुसार भोर-साँझ घना कुहेसा रहत। संगहि दिनमे रौदक कारण लोककेँ किछु राहत भेटि सकैत अछि।
बढ़ैत जाड़क बीच बरखा तापमानकेँ आओर कम कऽ सकैत अछि। वर्तमानमे अधिकांश जिलामे कुहेसक चादर देखल जा रहल अछि। एहि कारणेँ सड़कपर दृश्यता बहुत कम भऽ गेल अछि आ लोकसभकेँ गाड़ी चलाबयमे बहुत कठिनाई भऽ रहल अछि।
मौसम विभागक अनुसार ४ सँ ६ जनवरीक बीच राज्यक बक्सर, भोजपुर, रोहतास, भबुआ, औरंगाबाद आ भागलपुरमे मध्यमसँ हल्लुक बरखा भऽ सकैत अछि। संगहि राज्यक अधिकांश जिलामे बूंदाबांदी होयबाक सम्भावना अछि। मौसम विज्ञानी लोकसभकेँ बदलैत मौसमक बीच अपन आ अपन परिवारक विशेष देखभाल करबाक सलाह देलनि अछि।
भागलपुर आ पूर्णिया जिलाकेँ देशक १० प्रदूषित शहरक सूचीमे शामिल कयल गेल अछि। बिहारक कतेको जिलामे वायु गुणवत्ता सूचकांक (एक्यूआई) एखनो ३७० केँ पार कऽ गेल अछि, जे बहुत खराब मानल जाइत अछि।
मौसम विभागक अनुसार शुक्रदिन पटनामे बरखा भऽ सकैत अछि। ओतहि अगिला तीन दिन धरि शहरमे कुहेसक चादर देखल जा सकैत अछि। विभागक अनुसार ८ जनवरी धरि तापमान ११ डिग्री सेल्सियस धरि खसि सकैत अछि।
