बाईक चोरी कऽ भागि रहल दूटा चोर पकड़ल गेल

राजनगर समदिया
*

राजनगर थाना क्षेत्रक रांटी चौक पर दूटा मोटरसाइकिल चोर पकड़ल गेल। पकड़ल गेल दुनु चोर लहेरियागंज मधुबनीसँ मोटरसाइकिल चोरी कऽ चकदह दिसि भागि रहल छल।

एहि सम्बंधमे भेटल जानकारीक अनुसार लहेरियागंज बुबना कालोनी निवासी पिंटू कुमार कारक केर अपाची मोटरसाइकिल हुनक दरवाजासँ चोरी कऽ लेल गेल छल। चोरी होयबाक किछु कालक बाद बाइक मालिक पिंटू द्वारा जखनि चोरी कऽ लेल बाइकमे लागल जीपीएस केर ट्रैक कयलनि त पता चलल कि चोर रांटी दिस भागि रहल अछि। पिंटू द्वारा जखनि पीछा कयल गेल त बाइक सहित दुनु चोर रांटी चौक पर भेटल। बाइक सहित दुनु चोरकेँ स्थानीय लोकक मदतिसँ बाइक चोर बाइकक सँग पकड़ल गेल आ राजनगर थाना पुलिसकेँ सूचित कयल गेल। पकड़ल गेल दुनु चोर राजनगर थाना क्षेत्रक मंगरौनी शेखटोली मो तनवीर आ मो आलम केर रूपमे चिन्हित कयल गेल।

एहि सम्बंधमे बाइक मालिक पिंटू कुमार कारक द्वारा राजनगर थानामे प्राथमिकी दर्ज कराओल गेल अछि। पकड़ल गेल दुनु चोरकेँ न्यायिक हिरासतमे पठा देल गेल अछि।