केन्द्रीय शिक्षा मंत्री धर्मेन्द्र प्रधान सोमदिन कहलनि जे पीएम श्री योजनाक अन्तर्गत तमिलनाडुकेँ धनक आवंटन करबामे कोनो कठिनाई नहि अछि। ओ इहो उल्लेख कयलनि जे ओ (तमिलनाडु) एहिमे कोनो रुचि नहि देखा रहल अछि। ओ राज्यसँ पीएम श्री कार्यक्रम लागू करबाक अपील कयलनि।
शिक्षा मंत्री कहलनि जे विज्ञान शिक्षा ‘पीएम श्री’ स्कूल योजनाक एकटा महत्वपूर्ण हिस्सा अछि। नवाचार एहि कार्यक्रमक एकटा महत्वपूर्ण हिस्सा अछि। तहिना भाषा सेहो एहि योजनाक एकटा महत्वपूर्ण अंग अछि। ओ एक बेर फेर तमिल भाषाक महत्वपर जोर देलनि। ओ कहलनि जे पीएम श्री योजनामे तमिलनाडुक स्कूलमे शिक्षाक माध्यम तमिल होयत। एकर बादो हम बुझि नहि पाबि रहल छी जे एकर विरोध किएक भऽ रहल अछि। पीएम स्कूल फॉर राइजिंग इंडिया (पीएम श्री) एकटा केंद्रीय योजना अछि। एहि योजनाक अन्तर्गत पारदर्शी तरीकासँ विद्यालयक गुणवत्तामे सुधार कयल जाइत अछि।
डी.एम.के. केर सांसदलोकनि आरोप लगओलनि अछि जे केन्द्र तमिलनाडुकेँ शिक्षासँ सम्बन्धित धन उपलब्ध नहि करा रहल अछि। पीएम श्री’क अन्तर्गत लगभग २००० करोड़ आबंटित होयबाक छल। ओ लोकनि राष्ट्रीय शिक्षा नीति-२०२०क किछु प्रावधानक विरोध कयलनि अछि, जाहि कारणेँ ई कोष प्रदान नहि कयल गेल अछि। केंद्र सरकारक एहि डेगसँ तमिलनाडुक स्कूलमे पढ़य बला बच्चा सभ प्रभावित भऽ रहल अछि।
डीएमके सांसदक आरोपक जबाबमे केन्द्रीय शिक्षा मंत्री कहलनि जे हुनका लग कोनो तथ्य नहि अछि। ओ सभ मात्र हल्ला कऽ कोनो विषयक बारेमे भ्रम उत्पन्न करय चाहैत छथि। आइ १० मार्च अछि, आ एहि वित्तीय वर्षमे एखनो २० दिन बचल अछि। भारत सरकार हालक दिनमे तमिलनाडु सरकारसँ चर्चा कयलक अछि। एहि चर्चामे एकटा समझौताक मार्ग सेहो भेटल। जँ तमिलनाडु सरकार ओहि समझौतासँ सहमत अछि तखनि हमरा पीएम श्री’क अधीन धनक आवंटन करबामे कोनो आपत्ति नहि अछि।
ओ कहलनि जे एक या दूटा राज्य एखनो राजनीतिक कारण आ उद्देश्यसँ एकरा लागू करबा लेल तैयार नहि अछि। हम ओहि राज्य सभसँ अपील करैत छी जे संकीर्ण राजनीतिक कारणसँ पीएम श्री योजनाक हिस्सा नहि बनय चाहैत छथि ओ छात्रक शिक्षापर विचार करू आ एहि योजनामे शामिल होउ।
