मुख्यमंत्रीकेँ जनताक परवाह नहि, मात्र भाजपाकेँ कए रहल फॉलो : तेजस्वी

पटना समदिया
*

राष्ट्रीय जनता दल (राजद) काल्हि पटनाक वीर चन्द्र पटेल मार्ग पर स्थित राजद कार्यालयक सामने एक दिवसीय विरोध प्रदर्शन कयलक। एहि विरोध प्रदर्शनमे विपक्षक नेता तेजस्वी यादवक संग कतेको वरिष्ठ नेता आ कार्यकर्ता शामिल भेलाह।

विरोध प्रदर्शनक दौरान तेजस्वी यादव मुख्यमंत्री नीतीश कुमार आ एनडीए सरकार पर तीक्षण हमला कयलनि आ कतेको मुद्दा पर हुनकर आलोचना कयलनि। पत्रकारक संग बातचीतमे तेजस्वी यादव कहलनि जे महागठबंधन सरकार ६५ प्रतिशत आरक्षण लागू कयलक अछि, जकर उद्देश्य उत्पीड़ित आ उपेक्षित समुदायकेँ शिक्षा आ सरकारी नौकरीमे समान अवसर प्रदान करब अछि। एकर अतिरिक्त, हम १७ मासमे जाति आधारित जनगणना कयलहुँ, जे आरक्षण बढ़यबाक दिशामे एकटा डेग छल।

विपक्षक नेता आगू कहलनि कि हम १७ महीनामे लोककेँ नौकरी प्रदान कयलौंह आ आब जे नियुक्ति पत्र बांटल जा रहल अछि ओ हमर सरकारक दौरान प्रक्रियाक परिणाम अछि। मुख्यमंत्री नीतीश कुमार 2020 मे कहने छलाह जे सरकारी नौकरी असंभव अछि, सवाल उठौलनि जे पाइ कतयसँ आओत, की ई हुनक अपन जेबसँ आओत ? मुदा हम असंभवकेँ संभव बना देलहुँ।

राजद नेता आरोप लगौलनि जे एनडीए सरकार पिछड़ल आ अत्यंत पिछड़ल समुदायकेँ सरकारी नौकरीसँ वंचित कऽ देलक अछि। आइ जाहि ५१ हजारसँ बेसी नौकरीक लेल नियुक्ति पत्र वितरित कयल जा रहल अछि, ओहिमे ८,२२२ नौकरीसभ पिछड़ल आ अति पिछड़ल समुदायक नुकसान भेल अछि। जँ आरक्षण जारी रहैत तऽ ई नौकरी एहि श्रेणीमे जा सकैत छल, मुदा सरकार आरक्षण खतम करबाक काज कयलक अछि।

तेजस्वी यादव इहो कहलनि जे सरकार सर्वोच्च न्यायालयमे एहि मुद्दा पर अपन लड़ाई ठीकसँ नहि लड़ि रहल अछि। हम सभ मंच पर एहि मुद्दाक लेल संघर्ष कए रहल छी। हम सब सुप्रीम कोर्टमे वकील ठाढ़ करब आ पिछड़ा, दलित एवं आदिवासी वर्गक अधिकारकेँ सुरक्षित करय लेल हर संभव प्रयास करब। तेजस्वी यादव नीतीश कुमारक खिलाफ सेहो कड़ा टिप्पणी करैत कहलनि जे ई सरकार आरक्षण विरोधी, लोकतंत्र विरोधी आ भाईचारा विरोधी अछि। मुख्यमंत्री नीतीश कुमार मात्र अपन कुर्सी लेल काज कए रहल छथि, हुनका बिहारक लोकक कोनो परवाह नहि अछि। ओ इनकार करबाक स्थितिमे छथि आ हुनक घटैत स्थिति हुनक बयानसँ स्पष्ट रूपसँ देखबामे अबैत अछि।

ओ कहलनि जे नीतीश कुमार आ हुनकर पार्टी आब भारतीय जनता पार्टीक पाछू चलि रहल अछि, ओकरा फाॅलो कय रहल अछि। स्थिति आब एहेन भऽ गेल अछि जे नीतीश कुमारक पार्टीक भाजपाक अतिरिक्त आन केकरो संग कोनो सम्बन्ध नहि अछि। मुख्यमंत्रीक भाषा दिन-प्रतिदिन बिगड़ैत जा रहल अछि। ओ हरदम केकरो पैर पकड़बाक लेल तैयार रहैत छथि। संभवतः हुनकर अगिला डेग सम्राट चौधरी आ विजय कुमार सिन्हाक पैर पकड़ब होयत।

तेजस्वी यादव मुख्यमंत्री नीतीश कुमारसँ मांग करैत कहलनि जे महागठबंधन सरकारमे हम जे जाति आधारित जनगणना मॉडल लागू कयलौंह ओकरा पूरा देशमे लागू कयल जयबाक चाही।