काल्हि राष्ट्रिय पंचायत राज दिवसक अवसर पर पीएम मोदी बिहारक मधुबनी जिला पहुँचलाह। पहलगाम हमलाक बाद काल्हि पीएम मोदीक ई पहिल संबोधन छल। पीएम मोदी कहलनि जे दुश्मन सभ भारतक आत्मा पर हमला करबाक दुस्साहस कएलक अछि, ओकरा कल्पनासँ बेसी सजा भेटत। आतंकवादकेँ माटीमे मिला देबाक समय आबि गेल अछि।
प्रधानमंत्री नरेंद्र मोदी काल्हि मधुबनीमे राष्ट्रिय पंचायत राज दिवसक अवसर पर जनसभाकेँ संबोधित कएलन्हि। एहि दौरान मोदी पहिने पहलगाममे मारल गेल व्यक्तिकेँ श्रद्धांजलि देलनि, तकरबाद भाषणक शुरुआत कयलनि।
पीएम मोदी सख्त अंदाजमे कहलनि जे पहलगाममे जे आतंकवादी बेकसूर लोककेँ मारलक अछि आ जे व्यक्ति एहि साजिशक रचना कएलक अछि, ओकरा कल्पना’सँ सेहो बेसी सजा भेटत।
पीएम मोदी कहलनि जे पहलगाममे आतंकवादी द्वारा मासूम लोक सभक जे बेरहमीसँ हत्या कएल गेल अछि, सम्पूर्ण देश व्यथित अछि। सभ पीड़ित परिवार सभक दुखमे सम्पूर्ण देश एक संग ठाढ़ अछि। एहि हमलामे ककरो बेटा, भाई, पति मारल गेल। पीएम मोदी कहलनि जे देशक दुश्मन भारतक आत्मा पर हमला करबाक दुस्साहस कएलक अछि। ओ कहलनि कि, जे ई हमला कएलक अछि, आ संगे एहि हमलाक साजिश करयवालाकेँ कल्पनासँ अधिक सजा भेटत। आतंककेँ माटिमे मिला देबाक समय आबि गेल अछि। पीएम मोदी कहलनि जे भारतक आत्माकेँ आतंकवादसँ नहि तोड़ल जा सकैत अछि। आतंकवादीक बचल-खुचल जमीनकेँ माटिमे मिला देबाक समय आबि गेल अछि। 140 करोड़ भारतीय सभक इच्छाशक्ति आतंकक आका सभक कमर तोड़ि देत।
पंचायती राज दिवस पर पीएम मोदी कहलनि कि पूज्य बापूक दृढ़ विश्वास छल कि जाबति धरि धरतीक गाम मजबूत नहि होयत, ताबति धरि धरती केर तेज विकास नहि होयत। देशमे पंचायती राज केर परिकल्पना केर पाछु ई भावना अछि। बीतल दशकमे पंचायत सभक सशक्तिकरण लेल एक केर बाद एक डेग उठायल गेल अछि। टेक्नोलॉजी केर माध्यमसँ सेहो पंचायत सभकेँ मजबूतीमे योगदान देल गेल अछि। पीएम मोदी डिजिटल होबय केर लाभ बतौलनि। जमीनक दस्तावेज सभक डिजिटलीकरण विवाद सभ केर निपटारामे महत्वपूर्ण भूमिका निभा रहल अछि। ओ कहलनि कि आज़ादीक बाद देशक संसद केर नव भवन भेटल, ताहि संगे 30 हजार नव पंचायत भवन सेहो बनाओल गेल। सरकारक प्राथमिकता ग्राम पंचायत सभकेँ फंड देनाइ रहल, जाहिसँ गाम सभक विकास भेल।
जनतंत्रक बेसी-सँ-बेसी भागीदारीसँ सशक्त होइत अछि। महिला सभकेँ 33 प्रतिशत आरक्षणसँ लाभ होएत। बिहारक बहिन सभकेँ स्वंय सहायता समूहसँ जुड़ल महिलाकेँ 1 हजार करोड़क सहायता देल गेल, जाहिसँ ओ सब सशक्त बनि रहल छथि। लाखपति दिदी सेहो बनल छथि। गाममे घर, सड़क, शौचालय बनल। गाममे लाखों करोड़ टाका पहुँचल अछि। रोजगारक नव मौका भेटल अछि। पीएम आवास योजना केर लक्ष अछि जे कोनो गरीब परिवार बेघर नहि रहय। जिनका घर भेटल हुनकर मुंह पर संतोष आ आत्मविश्वासक भाव अछि। 4 लाख करोड़सँ बेसी पक्का घर बनल अछि। 3 करोड़ आर पक्का घर गरीब सभकेँ देल जाएत। आइ बिहारमे 10 लाख गरीब परिवार सभकेँ आर्थिक मदद पठायल गेल अछि, जाहिमे बिहारक गाममे 80 हजार आ शहरमे 1 लाख परिवार शामिल अछि।
ओ आगा कहलनि, एतय मेडिकल कॉलेजक संख्याक बृद्धि भऽ रहल अछि। गाममे सेहो नीक अस्पताल बनल अछि। बिहारमे 10 हजारसँ बेसी आयुष्मान आरोग्य मंदिर बनल अछि। बिहारमे जन औषधि केन्द्र बनाओल गेल अछि। बिहारक लोक सभकेँ 2 हजार करोड़ रुपैया दवाई पर होबयवाला खर्च बचल अछि। लाखों लोककेँ मुफ्त इलाज भेटल अछि।
सीएम नीतीश कुमार हुनक स्वागत कयलनि। सीएम नीतीश कुमार कहला कि हम महिलासभकेँ पंचायतमें 50 प्रतिशत आरक्षण देलौंह। ओ कहलनि कि हम हालहिमे प्रगति यात्राक माध्यमसँ बिहारक काज सभक जायजा लेलौंह। पीएम मोदीक नेतृत्वमे बिहारमे बहुत काज भेल अछि। सड़क योजना, बाढ़ि नियंत्रण आ स्वास्थ्यक लेल केन्द्र सरकार बहुत महत्वपूर्ण घोषणा कयलक। मखान बोर्डक घोषणा कयल गेल।
