भागलपुरक ललमटिया चौक स्थित धार्मिक स्थल पर दोसर समुदायक झण्डा फहरयलाक बाद तनाव बढ़ि गेल अछि। पुलिस आ शांति समिति मामिला केर शांत कयलक। पुलिस एहि मामलामे एक्शनमे अछि।
भागलपुरक ललमटिया थाना क्षेत्रक टमटम चौक पर सोमदिन एकटा धार्मिक स्थल पर दोसर समुदायक झण्डा फहरयलाक बाद तनाव पसरि गेल। जाहि कारणेँ दुनू पक्षक बीच तनावक स्थिति बनल अछि। सूचना भेटलाक बाद भागलपुर शहरक एसपी के. रामदास, डीएसपी-२ राकेश कुमार सहित कतेको पुलिस अधिकारी घटनास्थल पर पहुँचलाह। पुलिस आ पूजा समिति एवं शान्ति समितिक लोक पहुँचि मामिला शांत कयलनि। पुलिस एहि मामिलाक कारण चौक चौराहा पर कैंप कय रहल अछि। वर्तमानमे स्थिति सामान्य कहल जा रहल अछि।
नगर पुलिस अधीक्षक डॉ. के रामदास कहलनि जे ललमटिया चौक पर एकटा धार्मिक स्थल पर विशेष रंगक झंडा फहराओल गेल। सीसीटीवी कैमरा वीडियो फुटेजक जाँच कयल जायत आ अभियुक्तकेँ जल्दिये गिरफ्तार कयल जायत। स्थिति नियंत्रणमे अछि।
जनतब जे काली विसर्जनक समय एही ठाम एहिना झंडा फहराओल गेल छल। काली मूर्तिक विसर्जनक क्रममे एकटा युवक धार्मिक स्थलक बाहरक देवालपर चढ़ि विशेष रङ्गक झण्डा फहरओलक। जखनि वीडियो वायरल भेल तखनि पटनाक राजनीतिक गलियारामे हलचल मचि गेल।
ओतहि नाथनगरक ललमटिया थाना क्षेत्रक टमटम चौक लग एकटा धार्मिक स्थलक बाहरी दीवार पर चढ़ि विशेष रंगक झण्डा फहरयवला बदमाशकेँ पुलिस २४ घंटाक भीतर गिरफ्तार कऽ लेलक। भागलपुर पुलिस सोमदिन एकटा प्रेस कॉन्फ्रेंस कऽ उपद्रवी सभक खिलाफ त्वरित आ सख्त कारवाईक जानकारी देलक।
