चुनाव

तेजस्वीक दूटा वोटर कार्डक मामिलामे आरोप-प्रत्यारोप थमि नहिं रहल

पटना समदिया
*

बिहार विधानसभामे नेता प्रतिपक्ष तेजस्वी यादवक दूटा मतदाता कार्डक मामिलामे सत्ताधारी आ विपक्षी दल आमने-सामने अछि। एक दिसि विपक्ष सरकार पर धांधलीक आरोप लगा रहल अछि तँ दोसर दिसि सत्ताधारी दलक सांसद तेजस्वीक दूटा मतदाता कार्ड पर सवाल ठाढ़ कय रहल छथि।

असलमे एहि साल बिहारमे चुनाव होबय वाला अछि। राज्यमे एसआईआरक मुद्दा गरम अछि। बिहार विधानसभामे प्रतिपक्षक नेता तेजस्वी यादव अपन नाम मतदाता सूचीमे नहि हेबाक दावा कयने छलाह, जकर जवाब रविदिन निर्वाचन पंजीकरण अधिकारी (ईआरओ) दैत तेजस्वी यादवक ईपीआईसी नंबर जारी कय देलनि।

मुदा, विवाद तखनि आओर बढ़ि गेल जखनि तेजस्वी यादवक नाम पर दूटा ईपीआईसी नंबरक मामिला सामने अयला पर राजग एकरा लपकि लेलक। तेजस्वी कहने छलाह जे पिछला लोकसभा चुनावमे जाहि वोटर कार्डसँ ओ ईपीआईसी नंबरसँ वोट देने छलाह ओ ईसीआईक सूचीमे नहि अछि। एकर संग आयोग दावा कयलक कि ई नाम एगो आओर ईपीआईसी नंबरसँ पंजीकृत अछि। एहेनमे दूटा मतदाता आईडी कार्डसँ तेजस्वीक परेशानी बढ़ि गेल अछि।

एहि मुद्दा पर कांग्रेस सांसद इमरान मसूद कहलनि जे जँ दूटा मतदाता आईडी कार्ड जारी भऽ रहल अछि तँ चुनाव आयोगकेँ एकर जवाब देबाक चाही, ओ दावा कयने छलाह जे कार्ड उचित सत्यापन आ जांचक बाद जारी भेल अछि, तखनि आब दूटा कार्ड कोना जारी भेल ?

ओ कहलनि जे, लोकसभा आ राज्यसभाक उद्देश्य तखने सार्थक होइत अछि जखनि लोकतंत्र जीवित रहैत अछि, लोकतंत्र मरत तऽ लोकसभा आ राज्यसभाक कोनो महत्व नहि रहत। दुर्भाग्यवश चुनाव आयोग लोकतंत्रकेँ कमजोर कय रहल अछि।

टीएमसीक सांसद कीर्ति आजाद कहलनि जे, चुनाव आयोग हुनक दुनू मतदाता कार्डक जांच कयलक अछि। दोसर दिसि भाजपा सांसद संजय जायसवाल कहलनि जे, “एहि लेल उचित जांच आ कार्यवाही केर जरूरत अछि। जौं महागठबंधन वा ‘इंडी’ ब्लॉकक प्रमुख चेहरा स्वयं हलफनामामे दूटा मतदाता आईडी कार्ड घोषित कय दुनू केर मीडियाक देखा देलक अछि तँ ई पता चलैत अछि जे ओ धोखाधड़ीमे शामिल छथि। हुनकर पिता पहिनेसँ कतेको घोटालामे संलिप्त छथि आओर एहेन बुझाइत अछि जे तेजस्वी हुनकासँ युवेवस्थामे सीख लेने छथि।

लोजपा (रामविलास) केर सांसद अरुण भारती कहलनि जे, तेजस्वी एसआईआर केर नाम पर अपन फर्जी एजेंडा चलाबय केर बहुत कोशिश कयलनि, मुदा एहि दौरान पता चलल जे हुनका लग स्वयं दू टा वोटर आईडी अछि, जौं तेजस्वीक दू टा वोटर आईडी अछि तँ एसआईआर आओर बेसी महत्वपूर्ण भऽ जाइत अछि।

Spread the love