बिहारमे मतदाता सूची लेल विशेष गहन संशोधन (एसआईआर) अभियानकें लऽ कऽ पटनासॅं दिल्ली धरि बबाल मचल अछि। एम्हर राष्ट्रीय जनता दल (राजद) केर नेता आ पूर्व उपमुख्यमंत्री तेजस्वी यादव एकटा पैघ बयान दैत कहलनि जे, “हम (महागठबंधन के सब दल) चुनावकें बहिष्कार पर विचार कय सकैत छी। हमरा सब लग ई विकल्प अछि।” तेजस्वी यादव केर ई बयान बिहारक राजनीतिमे हलचल मचा देलक अछि, खास कय आबयवला विधानसभा चुनावसॅं पहिने एकरा एगो पैघ राजनीतिक संकेतक रूपमे देखल जा रहल अछि।
एहि पर प्रतिक्रिया दैत भाजपा सांसद राजीव प्रताप रूडी कहलनि जे तेजस्वी यादव चुनाव बहिष्कारक गप कयलनि, मुदा इ नहि कहलनि जे ओ कोन चुनावक गप कय रहल छथि, शायद हुनका इ अहसास भऽ गेल अछि जे राजद आ महागठबंधनकें पूर्ण हारिक सामना करय पड़त, नहि तॅं ओ सिर्फ राजनीतिक बयान दऽ रहल छथि।
रूडी आगू कहलनि, “तेजश्वी गंभीर नेता छथि, आ जँ ई बात कहि रहल छथि तॅं’ एकर मतलब जे ओ अपन हारि देखि सकैत छथि।” तेजस्वी यादवक एही बयान पर एखनि धरि महागठबंधन केर कोनो स्पष्ट प्रतिक्रिया नै भेटल अछि, लेकिन ई बयान ऐहन समयमे आयल जखनि बिहारमे बेरोजगारी, जाति जनगणना, आ राज्यक संग कथित भेदभाव जकाॅं मुद्दा पर विपक्ष केंद्र सरकार पर हमला कय रहल अछि।
