तेजस्वी यादव बिहार विधानसभा चुनावमे अपनाकेँ मुख्यमंत्री पदक उम्मीदवार घोषित कयलथि। एहि पर कांग्रेस कन्नी काटि कहलक जे मुख्यमंत्रीक चेहराक संबंधमे इंडी गठबंधनमे एखन धरि कोनो फैसला नहि भेल अछि। तेजस्वीक ई दावा बिहारक राजनीतिमे हलचल मचा देलक अछि आओर सवाल उठि रहल अछि जे ई सिर्फ राजनीतिक स्टंट अछि वा एकर पाछु किछु सच्चाई अछि।
बिहारमे विधानसभा चुनावकेँ लऽ कय राजनीति गरम भऽ गेल अछि। महज एक दिन पहिने राजद नेता तेजस्वी यादव इंडी गठबंधनसँ स्वयंकेँ मुख्यमंत्री पदक उम्मीदवार घोषित कयलथि। तेजस्वी यादव कहलनि जे, हम बिहारमे मुख्यमंत्रीक चेहरा छी। इंडी गठबंधनमे एहि पर आपसी सहमति बनल अछि।
तेजस्वीक घोषणाक 24 घंटाक भीतर कांग्रेस फ्रंट पर आबि बैटिंग शुरू कऽ देलक। कांग्रेस तऽ एतेक तक कहि देलक जे बिहार विधानसभा चुनावक मुख्यमंत्री पदक उम्मीदवारक फैसला नहि एनडीएमे भेल अछि आओर नहि इंडी गठबंधनमे। आब कहल जा रहल अछि जे तेजस्वी स्वयं मियां मिठू बनबाक प्रयासमे छथि।
कांग्रेस तेजस्वी यादवक मुख्यमंत्री पदक उम्मीदवारक घोषणासँ तऽ दूर भऽ गेल छथि आ एक तरहसँ तेजस्वी यादवकेँ पैघ संदेश देलक अछि। बिहार कांग्रेसक प्रदेश अध्यक्ष राजेश कुमार कहलनि जे इंडी गठबंधनमे मुख्यमंत्री पदक उम्मीदवारक फैसला एखनि धरि नहि भऽ सकल अछि। इंडी गठबंधनक प्राथमिकता कोनो पदक उम्मीदवारक फैसला करब एखनि नहिं अछि। हम भाजपाकेँ हराबय केर रणनीति बना रहल छी। राजेश तेजस्वी यादवक सीएम उम्मीदवारक रूपमे अपनाकेँ प्रोजेक्ट करय केर दावाकेँ स्वीकार करय वा नकारयसँ बचैत रहलाह।
सवाल उठि रहल अछि जे जखनि खुद प्रदेश अध्यक्षकेँ मुख्यमंत्रीक फेसक कोनो जानकारी नहि अछि तखनि तेजस्वी एतेक पैघ घोषणा कोना कयलनि। की ई तेजस्वी यादवक राजनीतिक कदम अछि ? बिहार चुनाव लड़बासँ पहिने ओ इंडी गठबंधनसँ जुड़ल दलक संग-संग जनताक मनोदशाक सेहो आंकलन करय चाहैत छथि वा फेर दोसर कारण इहो भऽ सकैत अछि जे तेजस्वी इंडी गठबंधन दलकेँ इ संदेश देबए चाहैत छथि जे हुनका बिना बिहारमे कोनो विपक्षी पार्टी आगू नहि बढ़ि सकैत अछि।
जँ हुनका संग चलबाक अछि तखनि हुनका मुख्यमंत्रीक चेहरा बनाबय पड़त। वर्तमानमे एहि पूरा मुद्दा पर बिहारमे नव चर्चा शुरू भऽ गेल अछि आ संगहि राजनीतिक दलमे सेहो।
तेजस्वीक बयानक राजनीतिक प्रभाव सेहो आबयवला दिनमे देखल जा सकैत अछि।
जदयू कहलक जे राहुलकेँ स्तब्ध करयवला चेहरा नीक नहिं लगैत छनि। ई संभव नहि जे तेजस्वी बिहारमे कोनो पैघ घोषणा करथि आ जदयू कोनो प्रतिक्रिया नहि देत। जदयू केर तरफसँ पार्टीक प्रवक्ता नीरज कुमार कहलनि जे, राहुल गांधीकेँ तेजस्वीक चेहरा पसिन नहिं छनि। राहुल बेर-बेर बिहार अबैत छथि, मुदा तेजस्वीसँ भेंट नहि होइत छनि। आब तेजस्वी अपने मुँह मियां मिट्ठू बनि रहल छथि। मान नहि मान आ हम तोहर मेहमान जकाँ भ’ गेल अछि।
आब तेजस्वी यादवक पूरा बयान पर एक नजरि दी। तेजस्वी कहलनि जे हम मुख्यमंत्रीक चेहरा छी। इंडी गठबंधनमे समझौता भऽ गेल अछि। हमर सरकार बिहारमे बनय जा रहल अछि। जँ हमर सरकार बनत तऽ हम राज्यकेँ स्कॉटलैंडमे बदलि देब। भाजपाक सब नेता चिंटू सभ छथि। ई लोकनि नमाजवाद आ मौलाना स्क्रिप्टक गप्प करैत छथि । हम बिहारमे जाति आ धर्म आधारित राजनीति नहि होबय देब।
