लोकसभा चुनावक दोसर चरणक मतदान २६ अप्रैलकेँ होयत। चुनावसँ पहिने नेता प्रतिपक्ष तेजस्वी यादव पूर्णिया सर्किट हाउसमे प्रेस कॉन्फ्रेंस कऽ कतेको मुद्दाक उत्तर देलनि। एहि दौरान तेजस्वी यादव अपन बयानकेँ सरियेलनि।
ओ एकटा रैलीमे कहने छलाह, “अहां इंडिया गठबंधनक चुनाव करू। जँ अहाँ इंडिया गठबंधनक बीमा भारतीकेँ नहिं चुनैत छी तखन अहाँ एनडीएकेँ चुनू। तेजस्वी आब एहि बयानकेँ सरियाबैत कहलनि जे हम कहने छलहुं जे जँ अहां संविधानकेँ बचाबय चाहैत छी तऽ इंडियाकेँ वोट दिअ, नहि तऽ अगर एनडीए चुनाव जीतत तऽ संविधान खतरामे पड़ि जाएत।
तेजस्वी यादव इहो कहलनि जे हमर देशमे चुनाव लड़बाक अधिकार सबकेँ अछि। कियो कतहुसँ चुनाव लड़ि सकैत अछि। ओ इहो कहलनि जे पप्पू यादव एहिसँ पहिने सेहो कतेको चुनाव लड़ि चुकल छथि, की भेल अछि, सबकेँ पता अछि।
तेजस्वी आगू कहलनि “पहिल चरणक मतदान समाप्त भऽ गेल अछि आ दोसर चरणक मतदान २६ अप्रैलकेँ निर्धारित अछि। दोसर चरणक चुनावक प्रचारक आइ बृहस्पति कऽ अंतिम दिन अछि। ई बहुत महत्वपूर्ण चुनाव अछि। ई चुनाव देशक संविधान बचाबय केर चुनाव अछि। ई लोकतंत्रकेँ बचाबए केर चुनाव अछि। गंगा जमुनी तहजीबकेँ बचाबय केर चुनाव अछि।”
ओ कहलनि “भाजपा उम्मीदवार होइ वा ओकर नेता, ओ संविधानकेँ समाप्त करय केर बात कयलक अछि। बेर-बेर भाजपा नेता सभ कहलनि अछि जे जँ अहाँ हमरा सभकेँ प्रचंड बहुमत देब तऽ हम संविधान बदलि देब। भाजपाक कोनो शीर्ष नेता हुनका खिलाफ कारवाई नहिं कयलक अछि।
