बिहारमे हालहिमे अलग-अलग जिलामे पुल ढहबाक घटना राजनीतिक माहौल गर्म कऽ देलक अछि। नेता प्रतिपक्ष तेजस्वी यादव मुख्यमंत्री नीतीश कुमार आ प्रधानमंत्री नरेन्द्र मोदी पर तीक्षण कटाक्ष कयलनि अछि। पछिला एक सप्ताहमे तीन जिला अररिया, सीवान आ मोतिहारीमे पुल ढहबाक घटनासँ राज्य सरकारक निष्क्रियतापर सवाल उठि गेल अछि। १८ जूनकेँ अररियामे एकटा पुल खसि पड़ल, २२ जूनकेँ सिवानमे सालों पुरान पुल खसि पड़ल आ २३ जूनक भोरमे मोतिहारीमे एकटा आओर पुल खसि पड़ल। एहि घटनाक बाद तेजस्वी यादव मुख्यमंत्री नीतीश कुमार पर कटाक्ष करैत अपन सोशल मीडिया ‘एक्स’ पर लिखलनि, “पुल गिरे, भ्रष्टाचार के गुल खिले। १८ सालक मुख्यमंत्री नीतीश कुमार आ बेचारा दू-दू टा उप मुख्यमंत्री तऽ एहि सभक बारेमे जनिते नहिं छथि।”
बतबैत चली जे तेजस्वीक इ बयान सरकारक कार्यक्षमता आ ईमानदारी पर सवाल ठाढ़ करैत अछि। ओ नीतीश कुमारक शासनकेँ भ्रष्टाचारसँ जोड़लनि आ पुलक ढ़हबकेँ ओकर प्रत्यक्ष अभिव्यक्ति बतौलनि। ओतहि तेजस्वी व्यंग्यात्मक ढंगसँ कहलनि, “अधिकसँ अधिक की होयत ? डबल इंजनधारी लोक कहि देत कि पुल खुदकुशी कऽ रहल अछि वा मूस पुल खा रहल अछि।”
एकर संगहि तेजस्वी यादव आगू प्रधानमंत्री नरेंद्र मोदी पर सेहो निशाना साधलनि। ओ मोदीक चुटकी लैत कहलनि, “प्रधानमंत्री कहताह, ‘भाइ आ बहिन, चुपचाप पुल खसैत देखू नहि तँ तथाकथित जंगलराज आबि जायत। पुल ढहनाइ एक्ट ‘ऑफ गाॅड’ अछि। ई मोदीक गारंटीसँ सेहो पैघ गारंटीवाला पुल छल, मुदा भगवानक इच्छाक सामने कंक्रीटक पुलक की मजाल ?” ई बयान प्रधानमंत्रीक घोषणा आ वादा पर सीधा हमला अछि, जाहिमे तेजस्वी मोदीक दावाकेँ “भगवानक कार्य” कहि मोदीक गरिमापर सवाल उठौलनि।तेजस्वी यादव मुख्यमंत्री नीतीश कुमारक बयानक जिक्र करैत कहलनि, “मुख्यमंत्री कहताह, पहिने पुल गिरैत छल जी ? आब जखन हम सभ एक संग आबि गेल छी तखन पुल ढहि रहल अछि। जानि लिअ, एक-एक पुल ढहि रहल अछि। खसि रहल अछि तऽ खसि रहल अछि। ओ लोक सभ इ कएलक अछि जी ? ओ सभ नदी आ पानिसँ मिलि इ सभ गड़बड़ करैत रहैत छथि। हम सभ जांच करायब।” एहि बयानक माध्यमसँ तेजस्वी नीतीश कुमारक सम्भावित प्रतिक्रियाक उपहास कयलनि आ हुनका दोषी ठहरौलनि।
पछिला सप्ताहक दौरान बिहारक तीनटा अलग-अलग जिलामे पुल ढहबाक घटना राज्यक बुनियादी ढाँचा पर गम्भीर प्रश्न उठौलक अछि। १८ जूनकेँ अररियामे पुल ढहलाक बाद २२ जूनकेँ सिवानमे सालों पुरान पुल खसि पड़ल आ २३ जूनक भोरमे मोतिहारीमे एकटा आओर पुल खसि पड़ल। ई घटना राज्यक निर्माण गुणवत्ता आ प्रशासनिक नियंत्रणकेँ उजागर कऽ देलक अछि।
ओना तेजस्वी यादवक तीक्ष्ण बयानसँ राज्यक राजनीतिमे हलचल मचि गेल अछि। विपक्ष सरकार पर भ्रष्टाचार आ लापरवाहीक आरोप लगा रहल अछि, जखनि कि सरकार जांच आ सुधारक वादा कऽ रहल अछि। ई घटना सभ बिहारक राजनीतिकेँ नव मोड़ दऽ देलक अछि आ ई देखब दिलचस्प होएत कि आबयवाला दिनमे इ मामिला की रंग आनैत अछि।
