बिहारमे लोकसभा चुनावसँ पहिने बढ़ैत राजनीति केर बीच आरोप-प्रत्यारोप एक बेर फेर तेज भऽ गेल अछि। बिहारक पूर्व उपमुख्यमंत्री तेजस्वी यादव बीपीएससी परीक्षामे कथित पेपर लीक पर राज्य सरकारक आलोचना कयलनि अछि। वास्तवमे राजद नेता आ पूर्व उपमुख्यमंत्री तेजस्वी यादव राज्यमे जदयू-भाजपा गठबंधन केर नेतृत्व वाला नीतीश कुमार सरकार पर सवाल उठाबैत कहलनि, “बिहारमे तेसर चरणक बीपीएससी शिक्षक नियुक्ति परीक्षामे पेपर लीकक कारण ४ लाखसँ बेसी अभ्यर्थीकेँ नुकसान भेल अछि। ओ आरजेडी-जदयू गठबंधनक तत्कालीन राज्य सरकारक प्रशंसा करैत कहलनि, “हम १७ महीनामे चारि लाखसँ बेसी नौकरी देलहुँ। कोनो भर्ती परीक्षामे कहियो पेपर लीक नहिं भेल।”
जदयू-भाजपा गठबंधनक बिहार सरकारक कामकाज पर सवाल उठाबैत तेजस्वी यादव आगू कहलनि, “हम (पूर्व राजद-जदयू गठबंधन सरकार) मात्र ७० दिन मे दू चरणमे दू लाखसँ बेसी शिक्षकक नियुक्ति कयलहुं, जाहि दौरान शिक्षक भर्ती परीक्षाक दुनू चरणमे १७ लाखसँ बेसी उम्मीदवार भेलाक बादो कोनो तरहक शिकायत कहियो नहिं भेटल। ई सभ नियुक्ति निष्पक्ष, पारदर्शी आ सुचारू प्रक्रियाक माध्यमसँ कयल गेल छल।”
संगहि तेजस्वी यादव बिहारक मुख्यमंत्री नीतीश सरकार पर कटाक्ष करैत कहलनि, “आब बिहार सरकारमे एहेन कोन ताकत आ तत्व अछि, जाहि कारण तेसर चरणक नियुक्तिमे लाखों परीक्षार्थीकेँ समस्याक सामना करय पड़ि रहल अछि ?” आगू ओ कहलनि “हम अपन कार्यकालमे तेसर चरणमे एक लाखसँ बेसी शिक्षकक नियुक्ति करबाक नीतिगत निर्णय लेने छलहुँ। आब ई एनडीए सरकार एकरा किएक लटका, अटका आ भटका रहल अछि ?”
जानकारीक अनुसार बीपीएससी टीआरई-3 परीक्षा १५ मार्चकेँ आयोजित भेल छल। मीडियामे प्रकाशित खबरक अनुसार, हजारीबाग पुलिस सन्देहक आधार पर पूछताछ लेल दू सयसँ बेसी परीक्षार्थीकेँ पूछताछक लेल रोकलक। पुलिसकेँ एकटा विश्वसनीय स्रोतसँ सूचना भेटल आ सभकेँ हिरासतमे लेल गेल। कहल जा रहल अछि जे एहिमे सँ कोनो उम्मीदवार लग मोबाइल फोन नहिं छल। वर्तमानमे शीर्ष अधिकारी एहि मामिलामे किछु कहबासँ परहेज कऽ रहल छथि आ पुलिस एहि मामिलामे आगूक जाँच कऽ रहल अछि।
