तेजस्वी यादव बिहारमे महगी, अपराध आ बेरोजगारी केर लऽ कऽ सरकार पर जोरदार निशाना साधलनि अछि। ओ ट्वीट कऽ सरकार पर कतेको आरोप लगौलनि अछि।
बिहार विधानसभामे विपक्षक नेता आ राजद नेता तेजस्वी यादव सरकार पर जोरदार निशाना साधलनि अछि। तेजस्वी शनिकेँ एक्स हैंडल पर ट्वीट कयलनि जे “महगी मामिलामे बिहार देशमे शीर्ष पर अछि, जँ देशमे कतहु सबसँ बेसी बेरोजगारी अछि तँ ओ बिहारमे अछि, देशक सबसँ बेसी अपराध बिहारमे भऽ रहल अछि।”
तेजस्वी यादव कहलनि जे नीति आयोगक सतत विकास सूचकांकमे बिहार सबसँ नीचा अछि। आयक मामिलामे बिहार सबसँ कम अछि। गरीबी उन्मूलनमे बिहार सबसँ नीचा अछि। ओ आरोप लगओलनि जे बिहारमे सबसँ बेसी भुखमरी अछि। बिहार गुणवत्तापूर्ण शिक्षा आ लैंगिक समानतामे पाछू अछि।
नेता प्रतिपक्ष एहि सभक लेल भाजपा-जदयू सरकारकेँ दोषी ठहरौलनि। तेजस्वी कहलनि, बिहारमे १५ सालसँ बेसी समयसँ एनडीए सरकार अछि। केंद्रमे पिछला १० सालसँ एनडीए सरकार अछि। एकर बावजूद बिहार पाछू रहि गेल। हमर १७ महीनाक कार्यकालमे लोककेँ नौकरी भेटल, नीक शिक्षा, स्वास्थ्य आ अन्य विकास कार्य भेल।
जेडीयूक आलोचना करैत तेजस्वी कहलनि जे लगभग दू दशकक बादो मुख्यमंत्री नीतीश कुमार आ भाजपा कतेक दिन धरि दोसरकेँ दोष दऽ कऽ अपन दायित्वसँ भागैत रहत। आखिरकार, बिहारमे व्याप्त एहि रिकॉर्ड तोड़ महगी, बेरोजगारी, गरीबी आ अपराधक लेल के जिम्मेदार अछि, जे देशमे सबसँ बेसी अछि ? आखिरकार, नीतीश कुमार कहिया धरि बिहारकेँ अपन सत्तालोलुपता, स्वार्थपूर्ति आ अनैतिक असैद्धान्तिक उलटफेरक शिकार बनबैत रहताह।
