तेजस्वी यादव नहि, तेजप्रतापमे सीएम बनबाक क्षमता : वीवीआईपी सुप्रीमो
पटना समदिया
तेज प्रतापक संग गठबंधन करय वला पार्टी वीवीआईपी केर सुप्रीमो प्रदीप निषादक बयानसँ राजनीतिक तापमान बढ़ि गेल अछि। ओ वीईपी प्रमुख मुकेश सहनी पर सेहो हमला कयलनि।
एहि साल (2025) बिहारमे विधानसभा चुनाव अछि आओर महागठबंधनसँ सीएम चेहरा राजद नेता तेजस्वी यादव छथि। दोसर दिसि राजद आ लालू परिवारसँ निकालल गेल हुनक पैघ भाई तेज प्रताप यादव सेहो चुनावी मोडमे छथि। एम्हर तेज प्रतापसँ गठबंधन करय वला पार्टी वीवीआईपी केर सुप्रीमो प्रदीप निषादक दावा अछि जे तेजस्वी यादव नहिं तेजप्रतापमे सीएम बनय केर क्षमता अछि। प्रदीप निषाद सोमदिन (25 अगस्त 2025) केँ ई बयान देलनि। ई कहि ओ राजदक तनाव बढ़ा देलनि।
प्रदीप निषाद कहलनि जे, कोनो पढ़ल-लिखल व्यक्तिकेँ मुख्यमंत्री हेबाक चाही। तेजस्वी यादव नवम पास छथि। तेज प्रताप यादव शिक्षित छथि। हुनकामे मुख्यमंत्री बनबाक क्षमता छनि। प्रदीप निषाद कहलनि जे, हम पांच दल तेज प्रताप यादवक संग गठबंधन कयलहुँ अछि। बिहार विधानसभा चुनाव कोना लड़ल जाए एहि पर रणनीति तैयार कएल जा रहल अछि।
प्रदीप निषाद कहलनि जे, तेजप्रताप यादव 16 सीट पर चुनाव लड़बाक निर्णय लेलनि अछि। शेष सीट पर गठबंधनक लोक चुनाव लड़ताह। ओ कहलनि जे हम सब एखनि धरि इ तय नहि कयलहुँ अछि जे हम सब कतेक सीट पर चुनाव लड़ब। कतेक सीट जीतय लेल चुनाव लड़ल जाएत आओर हम सभ एहेन कतेको सीट पर लड़ब जतय मुकेश सहनीक पार्टीक उम्मीदवार लड़ताह। हम हुनका जीतय नहि देब। हम हुनका पराजित करबाक प्रयास करब।
प्रदीप निषाद कहला जे मुकेश सहनी निषादकेँ गुमराह कयलनि अछि, हम सब पूरा बिहारमे अपन समाजमे जा कय कहब जे ओ धोखेबाज छथि। ओ कारोबारी छथि। ओ कारोबार करबा लेल राजनीतिमे आयल छथि। मुकेश सहनी महागठबंधनमे 11 सँ 12 सीट पर चुनाव लड़ताह, मुदा एक सीट नहि जीतताह।
दोसर दिसि ओ कहलनि जे हमर गठबंधन बिहारक सबटा 243 सीट पर चुनाव लड़त। पैघ दावा करैत ओ कहलनि जे बिना हमर सबहक गठबंधनक ककरो सरकार नहि बनत। जिनका हम सब समर्थन करब ओकर सरकार बनत। हमर मांग इ रहत जे तेज प्रताप यादव मुख्यमंत्री बनथि।
