बिहारमे एसटीएफ आ निलंबित दारोगाक बीच भेल मुठभेड़मे भारी मात्रामे हथियार आ कारतूस बरामद भेल अछि। पुलिसक कहब अछि जे कतेको राउंड फायरिंग सेहो भेल अछि।
ई घटना समस्तीपुर जिला अन्तर्गत मोहिउद्दीननगर थाना क्षेत्रक सुल्तानपुर गंगा दियारामे घटल अछि, जतय एसटीएफ आ समस्तीपुर पुलिस संयुक्त रूपसँ ई कार्रवाई कयलक अछि।
एहि संबंधमे पुलिसक कहब अछि जे निलंबित एएसआई सरोज सिंहक घरसँ 1. एके 47, मैगजीन, 18 जिंदा कारतूस, एकटा इंसास राइफल, 4 मैगजीन, 70 जिंदा कारतूस, एक कार्बाइन, एक मैगजीन, जिंदा कारतूस-12, एक 306 राइफल, 45 जिंदा कारतूस, चारि खोखा, एक दुनाली राइफल बैरल, जमीनक दस्तावेज करीब एक करोड़ 10 लाख केर कीमतक एकटा बुलेट, एकटा एप्पल आईफोन, एकटा सैमसंग फोन आ 22टा मुहर बरामद भेल अछि।
शुक्रकेँ भोरे-भोर बिहार पुलिसक निलंबित एएसआई सरोज सिंह उर्फ निमकी सिंहक घर पुलिस पहुंचल। मुदा पुलिसकेँ देखला पर सरोज सिंह केर समर्थक पुलिस टीम पर गोली चलाबय लागल। फायरिंग शुरू होइते एसटीएफ सेहो फायरिंगक जवाबी कारवाई कयलक। एहि दौरान दुनू दिसिसँ कतेको राउंड फायरिंग भेल। अचानक भेल एहि फायरिंगसँ गाममे दहशत मचि गेल। मुदा एसटीएफ सरोज सिंहकेँ गिरफ्तार कs लेलक।
एसटीएफ केर एहि कारवाई केर दौरान पुलिस माइकक माध्यमसँ घोषणा कयलक आ लोककेँ घरमे रहय केर निर्देश देलक। एकर संग-संग एसटीएफ सेहो घोषणा कयलक आ मोबाइलसँ कोनो तरहक फोटो वा वीडियो लेबा पर रोक लगा देलक।
एहि संबंधमे एसटीएफ कहलक जे निलंबित एएसआईकेँ अपराधीसँ मिलीभगतक जानकारी भेटलाक बाद इ कारवाई कयल गेल अछि।
एसटीएफ लग इनपुट छल जे ओकर घरमे हथियारक भंडार नुकायल अछि आओर एहि जानकारीक आधार पर एसटीएफ ई कार्रवाई कयलक।
