बिहारमे काल्हि बुधदिन 1857 केर स्वतंत्रता संग्रामक महानायक वीर कुंवर सिंहकेँ विजयोत्सवकेँ शौर्य दिवस केर रूपमे मनायल गेल। एहि खास मौका पर पटनाक जेपी गंगा पथ पर भारतीय वायुसेना ‘सूर्य किरण’ एरोबेटिक टीम शानदार हवाई करतबक प्रदर्शन कयलक।
ई कार्यक्रम बिहार सरकार आ भारतीय वायुसेना द्वारा संयुक्त रूपसँ आयोजित कएल गेल। राज्यक मुख्यमंत्री नीतीश कुमार सभ्यता द्वार लग कार्यक्रम स्थल पर पहुँचि सूर्य किरण टीमक अद्भुत हवाई करतबक दृश्यावलोकन कएलनि आ वीर कुंवर सिंहक साहस केर नमन कएलनि।
मुख्यमंत्री संग उप मुख्यमंत्री सम्राट चौधरी आ विजय कुमार सिन्हा, विधानसभा अध्यक्ष नंद किशोर यादव, जल संसाधन मंत्री विजय कुमार चौधरी, ऊर्जा मंत्री बिजेन्द्र प्रसाद यादव, ग्रामीण कार्य मंत्री अशोक चौधरी, सहकारिता मंत्री डॉ. प्रेम कुमार, लोक स्वास्थ्य अभियंत्रण मंत्री नीरज कुमार सिंह आ सांसद राजीव प्रताप रूडी समेत बहुत सीनियर नेता आ अधिकारी सेहो उपस्थित रहलाह। हजारों संख्यामे आम जनता सेहो एहि आयोजनकेँ देखलनि आ वीर कुंवर सिंहकेँ शौर्यकेँ याद कयलनि।
एहि अद्भुत प्रदर्शनकेँ देखि मंत्री डॉ. प्रेम कुमार कहलन्हि जे ई दिन बिहारक इतिहासमे स्वर्ण अक्षरसँ लिखल जायत। वीर कुंवर सिंह जेहेन योद्धा लोकनिक बलिदानकेँ आजुक पीढ़ीकेँ जानब जरूरी अछि। ओ भारतीय वायु सेनाक सूर्य किरण टीमकेँ सराहना करैत कहलनि जे ई प्रदर्शन सेनाक तैयारी आ परिपक्वताक प्रतीक अछि।
ओतहि सांसद राजीव प्रताप रूडी कहला कि बिहारमे एहेन भव्य आयोजन पहिले कहियो नहि देखयमे आयल। सूर्य किरण टीम द्वारा कएल गेल ई हवाई प्रदर्शन स्वतंत्रता संग्रामक महायोद्धा वीर कुंवर सिंहकेँ एकटा सलामी अछि, जे हाथमे गोली लगला पर अपन हाथ काटि गंगामे प्रवाहित कय देने छलथि। ई आयोजन नहि केवल वीरताकेँ याद दिलाबय वला अछि, बल्कि युवामे देशभक्तिक भावना सेहो जागृत करयवाला साबित भेल।
