कांग्रेस उम्मीदवारक नामांकन रद्द भेलाक बाद निर्दलीय लोकनि सेहो अपन नामांकन वापिस लऽ लेलनि
*
सूरत
*
लोकसभा चुनावसँ पहिने सूरत लोकसभा सीट भाजपाक खातामे चलि गेल अछि। कांग्रेस उम्मीदवार नीलेश कुम्भणीक नामांकन खारिज भेलाक बाद निर्दलीय उम्मीदवार अपन नामांकन पत्र वापिस लऽ लेलनि। एहि सन्दर्भमे मुकेश दलालकेँ निर्विरोध चुनल मानल जा रहल अछि।
लोकसभा चुनाव २०२४क परिणाम ४ जूनकेँ आओत, मुदा भाजपाक लेल एकटा सुखद अवसर अछि। सूरत लोकसभा सीट पर भाजपाक मुकेश कुमार दलाल जीतलाह, वास्तवमे आन सभ उम्मीदवार मुकेश कुमार दलालक सामने अपन नाम वापस लऽ लेने छथि। एतय कुल १२ उम्मीदवार चुनाव मैदानमे छल। कांग्रेस उम्मीदवार नीलेश कुम्भणीक नामांकन रविदिन खारिज कऽ देल गेल।
गुजरातक सूरत लोकसभा सीटक लेल कुल २४ गोटे अपन नामांकन पत्र दाखिल कयने छलाह। एहिमेसँ १२ गोटेक नामांकन जाँचक क्रममे खारिज कऽ देल गेल। चुनाव मैदानमे शेष १२ उम्मीदवारमे सँ ११ गोटे अपन नामांकन वापिस लऽ लेलनि। एहि तरहेँ चुनावी मैदानमे एकमात्र भाजपा उम्मीदवार मुकेश कुमार दलाल बाँचल छलाह। हुनक समक्ष कियो चुनौती देबयवाला नहिं बाँचल अछि, तें ओ निर्विरोध निर्वाचित कय देल जयताह।
