छात्र लोकनि TRE 4 नोटिफिकेशनमे देरी पर बैसलाह भूख हड़ताल पर
पटना । समदिया
TRE 4 विज्ञापन जारी करए केर मांग पर शिक्षक अभ्यर्थी आब भूख हड़ताल पर बैसि गेल छथि। अभ्यर्थी सभक कहब अछि कि बिहार लोक सेवा आयोग (BPSC) एखनि धरि TRE 4 परीक्षाक निश्चित तारीख घोषित नहि कएलक अछि।
पटनामे TRE 4 विज्ञापन जारी करएकेँ मांग लए एक बेर फेर शिक्षक अभ्यर्थी सड़क पर उतरि गेल छथि। करीब दू सालसँ TRE 4 परीक्षाक इंतजार करैत अभ्यर्थी आब भूख हड़ताल पर बैसि गेल छथि। राजधानी पटनाक गर्दनीबाग धरना स्थल पर सैकड़ों संख्यामे अभ्यर्थी जुटि कए बिहार सरकारक खिलाफ जोरदार प्रदर्शन कएलनि।
प्रदर्शन करैत अभ्यर्थी सभक कहब अछि कि BPSC द्वारा जारी परीक्षा कैलेंडरमे TRE 4 परीक्षाक जिक्र तऽ कएल गेल, मुदा एखनि धरि कोनो निश्चित तारीख घोषित नहि भेल अछि, जाहिसँ अभ्यर्थी सभमे असमंजस आ नाराजगी बढ़ैत जा रहल अछि।
प्रदर्शन करैत छात्र-छात्रा सभ आरोप लगौलनि कि मुख्यमंत्री पहिने परीक्षा जल्दी कराबएकेँ आश्वासन देने छलाह, मुदा एखनि ओहिमे देरी भऽ रहल अछि। हुनकर कहब अछि कि शिक्षा मंत्री मुख्यमंत्रीक निर्देशकेँ सही ढंगसँ पालन नहि कऽ रहल छथि। छात्र नेता दिलीप सवाल उठबैत कहलनि कि नोटिफिकेशन जारी करएमे आखिर दिक्कत की अछि, जखनकि पहिने सेहो नोटिफिकेशन जारी भेल अछि आ यदि कोनो त्रुटि होइत अछि तऽ बादमे संशोधन कएल जा सकैत अछि।
आंदोलनमे शामिल एकटा महिला अभ्यर्थी अपन पीड़ा साझा करैत कहलनि कि हुनकर पिता नहि छनि आ माए कर्ज लए हुनका पढ़ौलनि अछि। परिवारक जिम्मेदारी हुनकर कंधा पर अछि, मुदा परीक्षामे लगातार होइत देरीसँ हुनका बहुत दिक्कत भऽ रहल अछि। अभ्यर्थी सभक कहब अछि कि जँ जल्दी TRE 4 केर नोटिफिकेशन जारी नहि कएल गेल, तऽ हुनकर भविष्य अंधकारमय भऽ जाएत, कियैक तँ शिक्षा हासिल कयलाक बादो ओ बेरोजगार छथि।
