छात्राक माथमे गोली मारि हत्या, भीड़ स्कूल वैनमे लगेलक आगि

समस्तीपुर समदिया
*

समस्तीपुर जिलाक शिवाजीनगर थाना क्षेत्रमे सोमदिन भोरमे कोचिंग करय जा रहल एकटा छात्राकेँ गोली मारि कs हत्या कs देलक। घटनाक बाद इलाकामे तनाव पसरल। आक्रोशित ग्रामीण बहेरी स्थित एकटा निजी स्कूलक गाड़ीमे आगि लगा कs दरभंगा-सिंघिया- रोसड़ा मुख्य सड़ककेँ जाम कs नाराबाजी शुरू कs देलक। मृतकक पहिचान परसा गाम, तेलिया टोल (उत्तर परसा) निवासी गुडिया कुमारी (१९ वर्ष) बताओल गेल अछि।

बीपीएससीक तैयारीक लेल ओ रोज दरभंगा जिलाक बहेरीमे कोचिंगमे जाइत छलीह। सोमदिन भोरे एकटा फुटपाथ गाछीक रास्ता होइत जा रहल छलीह, तखने परसा आ बघौनी गामक बीच एकटा अज्ञात बदमाश हुनका गोली मारि देलक। गोलीक आवाज सुनि आसपासक लोक मौका पर पहुंचल आ हुनका अस्पताल लs गेल, जतय डॉक्टर हुनका मृत घोषित कs देलक।

परिजन बहेरीक एकटा निजी हाई स्कूलक शिक्षक पर हत्याक आरोप लगौने अछि। हुनकर कहब अछि कि मृतक केर पैघ बहिनक संग आरोपी केर प्रेम संबंध छल, जेकर विरोध गुडिया कऽ रहल छल । एहि बातसँ क्रोधित शिक्षक हुनकर हत्याक साजिश रचलनि । परिजनक अनुसार आरोपी शिक्षक पिछला कतेको मससँ धमकी दs रहल छल। दू–तीन मास पहिने एहि संबंधमे शिवजीनगर थानामे सेहो शिकायत दर्ज कराओल गेल छल, मुदा पुलिस कोनो कारवाई नहि कयलक।

घटनाक बाद आक्रोशित भीड़ आरोपीकेँ तत्काल गिरफ्तारीक मांग कs रहल अछि। मौका पर चारि थानाक पुलिस आ रोसडा डीएसपी मौजूद छलथि। भीड़ पुलिसकेँ शव उठाबयसँ रोकि रहल छल। पुलिस मामिलाक जांच कs रहल अछि आओर तनावकेँ देखैत अतिरिक्त बल तैनात कएल गेल अछि।